पुणे : तुम्हाला कोरोनाचा संसर्ग झालाय? रिपोर्ट पॉझिटिव्ह आलाय? तर, लगेच ‘हाय रिजोल्युशन कॉम्प्युटेड टोमोग्राफी’ (एचआरसीटी) करण्यासाठी धावाधाव करू नका. सर्वप्रथम डॉक्टरांचा सल्ला घ्या, असे आवाहन वैद्यकीय तज्ज्ञांनी केले. कोरोनाचा रिपोर्ट पॉझिटिव्ह आल्यानंतर ‘एचआरसीटी’चा आपला ‘स्कोर’ किती आहे, याची तपासणी करण्यासाठी डायग्नॉस्टिक लॅबच्या वळत असल्याचे चित्र शहरात दिसत आहे. या बद्दल ‘सकाळ’ने शहरातील वैद्यकीय तज्ज्ञांशी संवाद साधला. त्या वेळी त्यांनी हे आवाहन केले.
रूबी हॉल क्लिनिकचे डॉ. कपिल झिरपे म्हणाले, ‘‘कोरोना उद्रेकाचा दुसरा टप्पा आता सुरू आहे. यात ‘एचआरसीटी’चा स्कोर आणि प्रत्यक्षात रुग्णाला तपासल्यानंतरची त्याची प्रकृती यातील मोठ्या विरोधाभासाचे स्पष्टपणे निदान होते. ‘एचआरसीटी’चा नंबर जास्त असला तरीही रुग्ण ‘क्लिनिकली’ व्यवस्थित असतो. त्याला रुग्णालयात दाखल करण्याची खरंच गरज नसते. ‘एचआरसीटी’चा स्कोर जास्त असला तरीही त्याच्यावर घरात विलगिकरण करून यशस्वी उपचार करता येतात.’’
हेही वाचा : सोनं ४० हजारांच्या खाली येणार? पाहा तज्ज्ञ काय म्हणतात
कोरोनामुळे अत्यवस्थ होणाऱ्या रुग्णांना व्हेंटिलेटरपेक्षाही ऑक्सिजन बेडची गरज जास्त असल्याचे निरीक्षण वैद्यकीय तज्ज्ञांनी नोंदविले आहे. कोरोनाबाधित रुग्णांच्या संख्येत वाढ झाल्याने ऑक्सिजन बेडची मागणीही वाढली आहे.
दाखल होण्याचा हट्ट नको
कोरोनाच्या प्रत्येक रुग्णाला उपचारांसाठी दाखल करणे प्रत्यक्षात शक्य नाही. त्यामुळे नेमक्या कोणत्या रुग्णालयात दाखल करायचे, हे निश्चित करण्यात आले आहे. लक्षणे नसलेल्या किंवा सौम्य लक्षणे असलेल्या (माइल्ड) तसेच, मध्यम लक्षणांच्या रुग्णांवर (मॉडरेट) घरीच उपचार करता येतील. अशा रुग्णांनी आणि त्यांच्या नातेवाइकांनी घाबरून उपचारासाठी रुग्णालयात दाखल होण्याचा हट्ट सोडावा, असा सल्लाही वैद्यकीय तज्ज्ञांनी दिला. फक्त अत्यवस्थ, गंभीर लक्षणे असलेल्या रुग्णांनाच दाखल करण्याची भूमिका डॉक्टरांनी घेण्याची गरज असल्याचेही त्यांनी स्पष्ट केले.
हेही वाचा : PAN-आधारशी लिंक झालं की नाही? असं तपासा स्टेटस
''कोरोनाबाधित ज्येष्ठ नागरिक आणि अत्यवस्थ रुग्ण यांच्यावरील उपचारांची नेमकी दिशा निश्चित करण्यासाठी सिटी स्कॅन उपयुक्त ठरतो. पण, कोणतीही लक्षणे नसलेल्या किंवा सौम्य लक्षणांच्या रुग्णांनी ही वैद्यकीय तपासणी करण्याची गरज नाही.''
- डॉ. वीरेन कुलकर्णी, रेडिओलॉजिस्ट
''कोरोना झालेल्या रुग्णाच्या ‘एचआरसीटी़’त नुसता स्कोर न बघता रुग्णाच्या रक्तातील ऑक्सिजनची पातळी किती आहे, त्याला दम लागतो का, सतत जास्त म्हणजे १०० डिगरीपेक्षा जास्त ताप येतो का, हे सर्व निकष ‘एचआरसीटी़’ बरोबर बारकाईने बघितले जातात. रुग्णाच्या उपचारासाठी दिशा यावरून ठरविली जाते.''
- कपिल झिरपे, अतिदक्षता विभाग तज्ज्ञ, रूबी हॉल क्लिनिक
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.