डोर्लेवाडी - बारामती तालुक्यातील कोरोनाचा वाढता प्रभाव लक्षात घेऊन डोर्लेवाडी येथे मंगळवार (ता.३०) रोजी होणारी संत तुकाराम महाराज बीजे निमित्तची यात्रा व गुरुवारचा आठवडे बाजार बंद करण्याचा निर्णय संत तुकाराम महाराज देवस्थान समिती व ग्रामपंचायतच्या वतीने घेण्यात आला आहे. प्रति देहू समजल्या जाणाऱ्या डोर्लेवाडी (ता. बारामती) येथे संत तुकाराम महाराज बीज यात्रेनिमित्त पुणे, सातारा, सोलापूर जिल्ह्यातील सुमारे ५० हजाराहून अधिक भाविक दर्शनासाठी येत असतात. गेल्यावर्षी यात्रा झाल्यानंतर काही दिवसातच राज्यात कोरोनाचे रुग्ण वाढू लागल्यामुळे लॉकडाऊन करण्याचा निर्णय घेण्यात आला होता. त्यामुळे येथील यात्रा ही शेवटची यात्रा ठरली होती.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

गेल्यावर्षीच्या तुलनेत यावर्षी पुणे जिल्ह्यासह बारामती तालुक्यात कोरोनाची परिस्थिती भयंकर असल्याने बीजेचा उत्सव, यात्रा साजरी करणे उचित ठरणार याचा विचार करून व प्रशासनास सहकार्य करण्याच्या हेतूने येथील मंगळवारी होणारी यात्रा व गुरुवारचा आठवडे बाजार रद्द करण्याचा निर्णय संत तुकाराम महाराज देवस्थान समिती व ग्रामपंचायतीच्या वतीने घेण्यात आला आहे. यावेळी बारामती शहर पोलीस स्टेशनचे पोलीस निरीक्षक नामदेव शिंदे, सरपंच बाळासाहेब सलवदे, देवस्थान समितीचे प्रमुख अशोक नवले, रमेश मोरे, तंटामुक्त अध्यक्ष मिलिंद भोपळे, पोलीस पाटील नवनाथ मदने, ग्रामपंचायत सदस्य रामभाऊ कालगावकर, दत्तात्रय काळोखे, दादा दळवी, संदीप नाळे, सचिन दळवी आदी उपस्थित होते. 

कोरोना लस घेतली का? अजित पवार यांच्या उत्तराने उपस्थितांमध्ये पिकला हशा

डोर्लेवाडी येथील संत तुकाराम महाराज बीज यात्रा दरवर्षी मोठ्या प्रमाणात भरते. येथील यात्रेला हजारो भाविक दर्शनासाठी येत असतात. कोरोना संसर्गाचा विचार करून प्रशासनाच्या सुचनेपुर्वीच देवस्थान समिती व ग्रामपंचायत यांनी यात्रा व आठवडे बाजार रद्द करण्याचा निर्णय घेतल्याने त्यांचे मी प्रशासनाच्या वतीने कौतुक करतो. बीजे दिवशी गर्दी होऊ नये यासाठी पोलीस बंदोबस्त ठेवण्यात येईल. असे मत पोलीस निरीक्षक नामदेव शिंदे यांनी व्यक्त केले.

Edited By - Prashant Patil