मंचर - आंबेगाव तालुक्याचे सुपुत्र व सावित्रीबाई फुले पुणे विद्यापीठाच्या विज्ञान आणि तंत्रज्ञान विभागाचे प्रभारी अधिष्ठाता डॉ. मनोहर गणपत चासकर यांची नांदेड येथील स्वामी रामनाथ तीर्थ मराठवाडा विद्यापीठाच्या कुलगुरूपदी नियुक्ती करण्यात आली आहे.

राज्यपाल तथा विद्यापीठाचे कुलपती रमेश बैस यांनी डॉ. चासकर यांच्या नियुक्तीचे आदेश पारित केले आहेत. डॉ. चासकर यांनी नुकताच कुलगुरु पदाचा पदभार स्वीकारला आहे.

डॉ. चासकर शेतकरी कुटुंबातील असून त्यांचे आईवडिलांचे फारसे शिक्षण झालेले नसतानाही अत्यंत प्रतिकूल परस्थितीत त्यांनी जिल्हा परिषद प्राथमिक शाळा व हुतात्मा बाबू गेनू माध्यमिक विद्यालय महाळुंगे पडवळ येथे इयत्ता दहावीपर्यंत शिक्षण पूर्ण केले. सावित्रीबाई फुले पुणे विद्यापीठातून रसायनशास्त्र विषयात बीएस्सी, एमएस्सी, तसेच पीएचडी पदवी प्राप्त केली आहे.

पुणे येथील प्रा.रामकृष्ण मोरे महाविद्यालयाचे प्राचार्य व शिक्षण मंडळ कार्यकारिणीवरही त्यांनी काम केले आहे.

जपानमधील नागोया विद्यापीठातून पोस्ट डॉक्टरेट व नागोया विद्यापीठांमध्ये व जर्मनीच्या हॅनोवर या विद्यापीठांमध्ये व्हिजिटिंग सायंटिस्ट म्हणून तसेच पुणे विद्यापीठाच्या विद्या परिषद, अधिसभा, मॅनेजमेंट कौन्सिल पदावर काम केले आहे.

त्यांचा संशोधनाचा विषय नॅनो मटेरिअल्स अँड अँप्लीकेशन, फोटो कॅटलिसिस, सिंथेसिस ऑफ फोटो कॅटलिसिस अँड स्टडीइट्स एन्व्हायरोन्मेंटल इन द प्रोसेस ऑफ युव्ही लाइट या क्षेत्रात आहे. शिक्षण व संशोधन क्षेत्रातील तब्बल ३५ वर्षाच्या अनुभवानंतर त्यांची कुलगुरूपदी निवड झाली आहे. या निवडीचे आंबेगाव तालुक्यातून स्वागत होत आहे.