पुणे - ‘मराठी साहित्यामध्ये दलित, शोषितांना नायक करणारे अण्णा भाऊ साठे हे पहिले साहित्यिक होय. त्यांच्या स्वप्नातील सभ्य, संपन्न, शोषणविरहित समाजाची निर्मिती करण्यासाठी, तसेच सर्व भेद मिटविण्यासाठी संघर्ष हा अटळ आहे आणि तो करावाच लागतो, हा त्यांच्या जीवनाचा व साहित्याचा सार आहे. यातच अण्णा भाऊंच्या साहित्यात मानवतावादी दृष्टिकोन आहे,’’ असे मत अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांनी व्यक्त केले.

सत्यांश पब्लिकेशन आणि यशोदा पब्लिकेशनतर्फे लोकशाहीर अण्णा भाऊ साठे यांच्या जन्मशताब्दीनिमित्त प्रकाशक मोहन वैराळ यांनी संपादित केलेल्या ‘साहित्यसम्राट’ या पुस्तकाचे प्रकाशन डॉ. सबनीस यांच्या हस्ते झाले, या वेळी ते बोलत होते. याप्रसंगी स्थायी समिती अध्यक्ष सुनील कांबळे यांचा सत्कार करण्यात आला. लोकशाहीर अण्णा भाऊ साठे आर्थिक विकास महामंडळाचे अध्यक्ष अमित गोरखे, ज्येष्ठ साहित्यिक प्रा. सोपान खुडे, डॉ. शरद गायकवाड, श्रीराम दुर्गे, सुरेश पाटोळे, प्रकाशक प्रकाश वैराळे आदी उपस्थित होते.

‘अण्णा भाऊंचे साहित्य व त्यांचे विचार समाजातील प्रत्येकापर्यंत पोहोचायला हवेत. त्यांचे गुण, विचार ‘साहित्यसम्राट’ या पुस्तकात मांडण्यात आले आहेत. 
त्यांचे विचार प्रत्येक युवा वर्गाने जाणून घेतले पाहिजेत,’’ असे मत गोरखे यांनी मांडले. प्रास्ताविक संपादक प्रकाश वैराळ यांनी केले. सुरेश पाटोळे यांनी सूत्रसंचालन केले.