पुणे : कोंढव्यातील कौसरबाग परिसरात भंगार मालाच्या गोदामासह शेजारी असलेल्या गॅरेजला शनिवारी पहाटे आग लागली. यात गोदाम आणि गॅरेजमधील चार वाहने भस्मसात झाली. दरम्यान, आगीची माहिती समजताच कोंढवा अग्निशामक दलातील जवान दशरथ माळवदकर यांनी वाढदिवसाचे औक्षण होताच घटनास्थळी धाव घेतली, त्यामुळे मोठा अनर्थ टळला. या घटनेत जीवितहानी झाली नाही. मात्र, भंगार माल आणि चारचाकी वाहने जळाली.

कौसरबाग परिसरातील गोदामाला शनिवारी सकाळी आग लागल्याची माहिती रहिवाशांनी अग्निशमन दलाला कळविली. त्यानंतर जवान तेथे त्वरित दाखल झाले. आगीचा भडका उडाल्याने जादा कुमक मागविण्यात आली. आठ बंबांच्या मदतीने ही आग आटोक्यात आणण्यात आली.

दरम्यान, माळवदकर यांचा आज वाढदिवस होता. त्यानिमित्ताने त्यांच्या घरी औक्षणाचा कार्यक्रम होता. मात्र, आगीची माहिती समजताच ते घटनास्थळी पोचले. त्यांनी केलेल्या मदतकार्याबद्दल वरिष्ठ अधिकाऱ्यांनी त्यांचे कौतुक केले.

जवानांच्या तत्परतेमुळे आग इतरत्र न पसरता धोका टळला व आग पूर्ण आटोक्यात आली, अशी माहिती कोंढवा अग्निशामक दलाचे प्रमुख समीर शेख यांनी दिली.

केंद्रप्रमुख समीर शेख, सुनील नाईकनवरे, फायरमन योगेश पिसाळ, रफिक शेख, शंकर नाईकनवरे, सागर दळवी, प्रथमेश निकम, सागर निकम, दशरथ माळवदकर, तांडेल नीलेश लोणकर यांनी ही आग आटोक्यात आणली. या सहकाऱ्यांनी माळवदकर यांना वाढदिवसाच्या शुभेच्छा देत कामावरील त्यांच्या निष्ठेचे कौतुक केले.

‘वाढदिवस असल्याने सुटी घ्या’, असा आग्रह कुटुंबीयांनी केला होता. मात्र, आग लागल्याचे समजल्याने ‘मला कामावर जावे लागेल. आपण नंतर वाढदिवस साजरा करू’, असे मी त्यांना समजावून सांगितले. त्यामुळे सकाळी सहा वाजता कुटुंबीयांनी माझे औक्षण केले आणि मी दुर्घटनास्थळी दाखल झालो.

- दशरथ माळवदकर, फायरमन, कोंढवा अग्निशमन केंद्र