जुन्नर : उत्पन्न बाजार समितीच्या निवडणुकीचे बिगुल वाजलं आहे. राज्य सहकारी निवडणूक प्राधिकरणानं मतदार यादी व निवडणूक कार्यक्रम जाहीर केला आहे. बाजार समितीची संचालक मंडळाची मुदत मागील वर्षी ३ ऑक्टोबर २० रोजी संपली होती मात्र कोरोनामुळे सुमारे एक वर्ष संचालक मंडळास मुदत वाढ मिळाली आहे. राज्यातील बाजार समित्यांच्या निवडणूक दोन टप्प्यात होत आहेत.जुन्नर कृषी उत्पन्न बाजार समितीची निवडणूक पहिल्या टप्प्यात होणार असल्याचे जुन्नरचे सहाय्यक निबंधक सचिन सरसमकर यांनी सांगितले.

मतदार यादी कार्यक्रमानुसार प्रारूप मतदार यादी करण्याचे काम सुरू असून मतदार यादी १० नोहेंबरला प्रसिद्ध होईल. मतदार यादीवर २२ नोहेंबर पर्यंत आक्षेप व हरकती नोंदविता येतील.त्यावर १ डिसेंबर रोजी निर्णय घेण्यात येऊन ६ डिसेंम्बरला अंतिम मतदार यादी प्रसिद्ध करण्यात येईल.

निवडणुकीचा कार्यक्रम १६ डिसेंबर रोजी प्रसिद्ध होणार असून २२ डिसेंबर पर्यंत नामनिर्देश पत्र दाखल करता येतील.२३ डिसेंबरला छाननी होऊन २४ डिसेंबरला वैध नामनिर्देशन पत्रांची यादी प्रसिद्ध करण्यात येणार आहे. त्यांनतर ७ जानेवारी २२ पर्यंत उमेदवारी अर्ज माघारीची मुदत आहे. त्यानंतर १७ जानेवारीला मतदान व १८ जानेवारीला मतमोजणी होणार आहे.

या निवडणुकीत कृषी उत्पन्न बाजार समितीच्या संचालक मंडळाची संख्या एक ने कमी होणार आहे.सोसायटी मतदार संघातून ११, ग्रामपंचायत मतदार संघातून ४, व्यापारी मतदार संघातून २ व हमाल मापाडी मतदार संघात एक अशा एकूण अठरा जागांसाठी निवडणूक होणार असून पणन मतदार संघातील एक जागा कमी झाली असल्याचे बाजार समितीचे सचिव रुपेश कवडे यांनी सांगितले. मागील दीड वर्षापासून कोरोनाचे सावट कायम असल्यामुळे वेगवेगळ्या निवडणुका लांबल्या होत्या. सध्या कोरोना रुग्णांची संख्या कमी झाली आहे. यामुळे निवडणुकीचे आयोजन करण्यात आले असल्याचे कवडे म्हणाले.