पुणे : सावित्रीबाई फुले पुणे विद्यापीठाशी संलग्न संशोधन केंद्रात प्रबंधासाठी लाच घेतल्याचा प्रकार उघडकीस आला. ही अत्यंत लाजिरवाणी व विद्यापीठाची प्रतिमा मलिन करणारी घटना आहे. त्यांच्यावर तातडीने आळा घालावा, अशी मागणी विद्यापीठ विद्यार्थी संघर्ष कृती समितीने कुलगुरूंना केली आहे. या संदर्भात सत्यशोधन समिती स्थापन करावी, अशी मागणी केली आहे.

समितीने संशोधक विद्यार्थ्यांच्या विविध प्रश्नांसंदर्भात कुलगुरूंना पत्र दिले. त्यात ते म्हणतात, ‘‘घडलेल्या प्रकाराचे गांभीर्य ओळखून स्वतंत्र सत्यशोधन समिती स्थापन करावी. सखोल चौकशीनंतर दोषींवर योग्य कारवाई करावी. अशा घटना पुढे घडणार नाहीत, म्हणून विद्यापीठ प्रशासनाने विद्यार्थ्यांच्या तक्रारी जाणून घेण्यासाठी निवृत्त वरिष्ठ प्राध्यापकांच्या नियंत्रणाखाली एक स्वतंत्र पीएच.डी. तक्रार निवारण केंद्राची व्यवस्था करावी. जेणेकरून संशोधक विद्यार्थी तक्रारी नोंदवू शकतील.’’

विद्यार्थ्यांच्या मागण्या

• विद्यापीठ आणि संलग्न महाविद्यालयांतील संशोधन केंद्रातील पीएच.डी. शुल्कात समानता असावी

• काही मार्गदर्शकांनी प्रोग्रेस रिपोर्ट आणि जेआरएफ फेलोशिप अर्जावरती सहीसाठी पैशांची मागणी केल्याच्या तक्रारी

• ज्या केंद्रावर संशोधनासाठी उपयुक्त सेवा-सुविधा उपलब्ध नसतील अशा संशोधन केंद्राची तत्काळ मान्यता रद्द करावी

• विद्यार्थ्यांचे शारीरिक, मानसिक आणि आर्थिक शोषण करणाऱ्या केंद्राच्या प्रमुखांवर कायदेशीर कठोर कारवाई करावी

• री-रजिस्ट्रेशन व एक्स्टेंशनसंदर्भात परिपत्रक काढून निराकरण करावे

संशोधन केंद्रावर केंद्रप्रमुख व मार्गदर्शक प्राध्यापक विद्यार्थ्यांना सातत्याने दबावात ठेवून त्यांचे आर्थिक, मानसिक व शारीरिक शोषण करत आहेत. दबावामुळे बरेच विद्यार्थी कुणाचीही तक्रार करत नाहीत. अशा विद्यार्थ्यांनी तत्काळ आमच्याशी अथवा विद्यापीठ प्रशासनाशी संपर्क साधावा.

- राहुल ससाणे,

विद्यापीठ विद्यार्थी संघर्ष कृती समिती