पुणे - ‘लिव्ह इन रिलेशनशिप’मध्ये राहणाऱ्या तरुणाने दुसऱ्या तरुणीशी लग्न ठरविल्यामुळे संगणक अभियंता तरुणीने गळफास घेऊन आत्महत्या केली. ही घटना बुधवारी फुरसुंगी परिसरात घडली. याप्रकरणी पोलिसांनी संगणक अभियंता तरुणास अटक केली.  

श्‍वेता अरुण बिश्‍वास (वय ३०, रा. निर्मला निवास, दस्तूर रोड, कॅम्प) असे आत्महत्या केलेल्या तरुणीचे नाव आहे. पोलिसांनी सचिन बबन कासिद (वय २९, स्वप्नलोक सोसायटी, फुरसुंगी) याला अटक केली आहे. श्‍वेता आणि सचिन हे शहरातील सॉफ्टवेअर कंपन्यांमध्ये संगणक अभियंता होते. ते दोघे काही वर्षांपासून ‘लिव्ह इन रिलेशनशिप’मध्ये सचिनच्या फुरसुंगी येथील घरी राहात होते.  श्‍वेताला सचिनसमवेत लग्न करायचे होते. 

दरम्यान, मागील रविवारी सचिन हा बार्शीमधील त्याच्या मूळ गावी गेला. त्या वेळी त्याने व त्याच्या कुटुंबीयांनी तिकडे एक मुलगी पाहिली. सचिनला ती मुलगी आवडल्याने त्याने तिच्यासमवेत लग्न करण्याचे ठरविले. त्यावरून श्‍वेता व सचिनचा वाद झाला. या सर्व प्रकारामुळे श्‍वेताला नैराश्‍य आले. 

याबाबत २६ फेब्रुवारीला आईला कॉल करून तिने सर्व प्रकार सांगितला. त्यानंतर तिने कॉल उचलला नव्हता. तिने २७ फेब्रुवारीला सचिनच्या फुरसुंगी येथील घरी गळफास घेऊन आत्महत्या केली. या प्रकरणाचा तपास सहायक पोलिस निरीक्षक के. एस. लोंढे करत आहेत.