हडपसर : एच.डी.एफ.सी. बँकेच्या वतीने आयोजित केलेल्या "टाइम अटॅक राष्ट्रीय  कार रॅलीमध्ये' मांजरी बुद्रुक येथील कु. निकिता नितीन टकले हिने तीन वर्गात प्रथम क्रमांक मिळविला आहे. स्पर्धेतील पदार्पणातच तीने आठ स्मृतिचिन्हे मिळवीत वयाच्या एकविसाव्या वर्षी घवघवीत यश संपादन केले आहे. वाघोली येथील महालक्ष्मी लॉनच्या मैदानावर ही स्पर्धा झाली.

निकिताने एकूण चौदा वर्गांपैकी दहा वर्गात सहभाग घेतला होता. त्यातील प्रो लेडीज, अमेचर लेडीज क्लास व एकूण स्पर्धेतील कामगिरीसाठी तीला प्रथम क्रमांक मिळाला. तर इतर आठ वर्गातील सहभागासह यशस्वी रायडींगसाठी तीला गौरविण्यात आले. निकीताच्या या यशाबद्दल सर्वत्र कौतुक होत आहे.

हैद्राबाद, बेंगलोर, चेन्नई, मुंबई, दिल्ली, नागपूर, पुणे, कोल्हापूर या भागातून १८५ कार रायडर या रॅलीत सहभागी झाले होते. वरून लाल, ध्रुव चंद्रशेखर, माझदयार वाछा, ख्याती मोदी, संजय लाल, प्रदीप नायर आदी दिग्गज रायडर्सने यामध्ये सहभाग घेतला होता. निकिताने पदार्पणातच आपल्या वैशिष्ट्यपूर्ण राईडसने चमकदार यश मिळवून सर्वांचे लक्ष वेधले आहे. यानिमित्ताने राईडसच्या क्षेत्रात या महिला खेळाडूने आपले नाव अधोरेखित केले आहे.

डर्ट रेस रॅली प्रकारात प्रत्येकाला दोन राउंड दिले होते. अतिशय खडतर असा मार्ग असताना मिळालेल्या संधीचे सोने करत निकिताने तीन मिनिटे बावीस सेकंदात राऊंड पूर्ण केला. स्पर्धेचे आयोजक कारपटू चेतन शिवराम यांच्या हस्ते तीचा सन्मान करण्यात आला.

"भारतात दोन स्पर्धात भाग घेऊन मी यश मिळविले आहे. कारपटू संजय टकले, वडील नितीन टकले यांच्या प्रेरणेने व राहुल संचेती, प्रफुल संचेती यांचे मार्गदर्शन घेत पुढील काळात आंतरराष्ट्रीय पातळीवर कार रेसमध्ये सहभागी होणार आहे. त्यामध्ये यश मिळवून भारताचा तिरंगा जगाच्या पातळीवर फडकावयाचा आहे,' अशी इच्छा निकिताने यावेळी व्यक्त केली.