पुणे, ता. १५ ः ‘‘अलीकडच्या काळात कौटुंबिक स्तरावर ज्येष्ठांच्या छळाच्या घटना मोठ्या प्रमाणात वाढू लागल्या आहेत. हे दुःखद असले तरी दाहक वास्तव आहे. मात्र ज्येष्ठांचा कौटुंबिक आणि सामाजिक स्तरावरील छळ हा कायद्याच्या चौकटीत सायलेंट क्राइम या वर्गवारीत येत असतो,’’ असे मत पुण्याचे माजी पोलिस आयुक्त जयंत उमराणीकर यांनी शुक्रवारी (ता. १४) एका जाहीर कार्यक्रमात बोलताना व्यक्त केले.
जागतिक ज्येष्ठ नागरिक छळ प्रतिबंध जनजागृती दिनानिमित्त जनसेवा फाउंडेशन, सावित्रीबाई फुले पुणे विद्यापीठ, आयएलसीआय, महाराष्ट्र ज्येष्ठ नागरिक महासंघ (फेस्कॉम), मध्यवर्ती ज्येष्ठ नागरिक संघ (अॅस्कॉप), भारतीय योग संस्थान, नवचैतन्य हास्य योग परिवार आणि विविध ज्येष्ठ नागरिक संघांच्या संयुक्त विद्यमाने काल निवारा वृद्धाश्रमाच्या सभागृहात आयोजित विशेष कार्यक्रमात प्रमुख पाहूणे म्हणून ते बोलत होते. या वेळी सामाजिक न्याय विभागाचे सहाय्यक आयुक्त मलिकार्जुन हरसुरे, निरीक्षक महेश घेवारे, जनसेवा फाउंडेशनचे विश्वस्त प्रा. जे. पी. देसाई, फेस्कॉमचे अध्यक्ष अरुण रोडे, अॅस्कॉपचे अध्यक्ष दिलीप पवार, लेकटाउन ज्येष्ठ नागरिक संघाचे अध्यक्ष प्राचार्य एस. आर. पाटील, कायदेतज्ज्ञ अॅड. बी. टी. निसळ, एकता योग ट्रस्टचे अध्यक्ष नाना निवंगुणे आणि चैतन्य हास्ययोग परिवाराचे अध्यक्ष विठ्ठलराव काटे आदी उपस्थित होते. या वेळी अॅड. बी. टी. निसळ लिखित ‘ज्येष्ठांचे प्रश्न आणि सरकारी अनास्था''’ या पुस्तकाचे प्रकाशन करण्यात आले.
जनसेवा फाउंडेशनचे विश्वस्त प्रा. जे. पी. देसाई यांनी प्रास्ताविक केले. फाउंडेशनचे कार्यकारिणी सदस्य मोहन खटावकर यांनी सूत्रसंचालन केले. लेकटाउन ज्येष्ठ नागरिक संघाचे अध्यक्ष प्राचार्य एस. आर. पाटील यांनी आभार मानले.