सासवड, ता. २४ : सासवड पोलिस ठाण्याच्या हद्दीतील हरणी गावात अवैध मद्य विक्री करणाऱ्या एकावर पोलिसांनी कारवाई केली. या प्रकरणी शंकर रघुनाथ यादव (रा. हरणी, ता. पुरंदर) याच्यावर महाराष्ट्र दारूबंदी कायद्यानुसार गुन्हा दाखल करण्यात आला आहे. बुधवारी (ता. २४) सायंकाळी साडेपाचच्या सुमारास हरणी- वाल्हे मार्गावरील एका शेडमध्ये शंकर यादव हा विनापरवाना विदेशी दारू विकत होता. दरम्यान, माहिती मिळताच पोलिस हवालदार संदीप पवार व त्यांच्या पथकाने छापा टाकून आरोपीच्या ताब्यातून ९६० रुपये किमतीच्या दारूच्या बाटल्या जप्त केल्या. या प्रकरणी सासवड पोलिस ठाण्यात गुन्हा दाखल करण्यात आला.