पुणे : धायरी येथील डीएसके विश्‍व सोसायटीच्या अंतर्गत रस्त्यांचा वापर काही बांधकाम व्यावसायिकांनी सुरू केला, तसेच डंपरची धोकादायक वाहतूक सुरू झाल्याने सोसायटीतील सुरक्षेचा प्रश्‍न ऐरणीवर आला. त्यामुळे आज (ता. १२) नागरिकांनी रस्त्यावर उतरून हा रस्ता सार्वजनिक नाही तर सोसायटीचा आहे असे सांगत डंपरची वाहतूक बंद केली. (Illegal Road Development In Pune Dhayari)

धायरी येथील डीएसके विश्‍वच्या अंतर्गत ९ सोसायटी असून, या सोसायटीच्या अंतर्गत रस्त्याची देखभाल दुरुस्ती, वीज, उद्यान, स्वच्छतेचा खर्च सोसायट्यांकडून केला जातो. मात्र, गेल्या काही दिवसांपासून डीएसके मधून जाणारा रस्ता सार्वजनिक असल्याप्रमाणे वापरला जात होता. बांधकाम साईटवरचा राडारोडा, मुरूम घेऊन जाणारे डंपर देखील हाच रस्ता वापरत असल्याने लहान मुले, वृद्ध, महिलांसह सकाळी व्यायामासाठी जाणाऱ्या नागरिकांनाही जीव मुठीत धरून सोसायटीमध्ये फिरावे लागत आहे.

या त्रासाला वैतागून आज नागरिक रस्त्यावर उतरून ही डंपर वाहतूक बंद केली. यावेळी संदीप चव्हाण, सचिन पांगारे, सनी पवार, राजीव कुलकर्णी, पारस महाले, संतोष चौधरी, अनंत पाटील आदी उपस्थित होते.

‘‘डीएसके विश्‍वमधून कोणीही रस्ता वापरत आहे, त्याचा त्रास येथे राहणाऱ्या नागरिकांना होत आहे. नागरिकांनी एकत्र येऊ आज डंपर वाहतूक बंद केली आहे. हा रस्ता इतरांना वापरता येणार नाही.’’

- प्रथमेश कुलकर्णी, रहिवासी,