उंड्री - पहिल्यांदा निवडणुकीला (Municipal Election) सामोरे जाणाऱ्या समाविष्ट गावातील (Villages) ग्रामपंचायत सदस्य, उपसरपंच, सरपंच, जि.प. सदस्य, अध्यक्ष, पं.स.सदस्य, सभापती यांच्या गर्दीमध्ये शहर-उपनगरामधील प्रभाग (Ward) असुरक्षित वाटू लागल्यामुळे नगरसेवकांनी (Corporator) घुसखोरी करण्याचा प्रयत्न सुरू केला आहे.

उपनगर आणि लगतच्या गावाकडे विद्यमान नगरसेवकांनी मोर्चा वळविला असून, गणेश जयंतीचा मुहूर्त साधत प्रचारही सुरू केला. प्रभागाची तोडफोड झाल्यामुळे आपल्याला सोयीचा प्रभाग निवडण्याकडे विद्यमानांसह इच्छुकांनी लक्ष केंद्रित केले आहे. नव्याने जाहीर केलेल्या प्रभागामध्ये विकासकामे करण्यासाठी आता विद्यमानांची चढाओढ सुरू झाली आहे.

आगामी महापालिका निवडणूक त्रिसदस्यीय प्रभाग (तीन नगरसेवकांचा एक प्रभाग) या पद्धतीने होणार आहे. सध्याच्या सभागृहाची मुदत १५ मार्च रोजी संपुष्टात येत आहेत. निवडणुकीसाठी काही दिवसांचा कालावधी राहिल्याने प्रभागात विकासकामे करण्यासाठीची धावपळ सर्वपक्षीय नगरसेवकांकडून सुरू झाली आहे. सध्या शहरातील प्रभाग रचना चार नगरसेवकांचा एक प्रभाग या पद्धतीची आहे. त्रिसदस्यीय प्रभाग रचना झाल्याने अनेक नगरसेवकांच्या प्रभागात मोठे फेरबदल झाले आहेत. प्रभागाचा काही भाग वगळण्यात आला असून, काही प्रभागांना नव्याने भाग जोडण्यात आले आहेत. आगामी निवडणुकीच्या पार्श्वभूमीवर येत्या काही दिवसांत मोठय़ा प्रमाणावर विकासकामांची उद्घाटने होतील तसेच काही कामांचे भूमीपूजन होणार असल्याचेही स्पष्ट झाले आहे.

महापालिका प्रशासनाकडे विकास कामांसाठी तरतूद करण्यासाठीची नगरसेवकांकडून शेकडो पत्रे प्रशासनाला प्राप्त झाल्याची माहिती सूत्रांनी दिली. क्षेत्रीय कार्यालयाच्या माध्यमातूनही कामे करून घेण्यासाठी नगरसेवक प्रयत्नशील असल्याचे दिसत आहेत. त्यातच आगामी निवडणूक त्रिसदस्यीय प्रभाग पद्धतीने होणार असल्याचे नोव्हेंबर महिन्यात स्पष्ट झाल्यानंतर नगरसेवकांकडून प्रभागांची पुनर्रचना गृहीत धरून त्या भागातही कामे सुचिवण्याचा सपाटा लावला आहे. या प्रकाराला गाववाले कसा प्रतिसाद देतात याकडे सर्वांचे लक्ष लागले आहे.

दिखाऊ कामांना महत्त्व

नव्याने जाहीर झालेल्या प्रभागात मतदारांना दिसतील अशी कामे करण्याकडे विद्यमानांनी मोर्चा वळविला आहे. तोंडदेखल्या कोणती कामे करता येतील, कोणती कामे झाली आहेत, याची चाचपणी करून नवी कामे सुचविली जात आहेत. या कामांसाठी महापालिका प्रशासनाने तातडीने निधी मंजूर करावा, यासाठी नगरसेवक आणि त्यांच्या कार्यकर्त्यांकडून खातेप्रमुख तसेच क्षेत्रीय कार्यलयातील अधिकाऱ्यांबरोबर बैठकांचा सपाटा सुरू आहे. एकूण कामांवरील खर्च पाच कोटी रुपयांपर्यंत होईल, अशी कामे नगरसेवकांकडून सुचविण्यात येत आहेत. रस्ते, वाहिन्या टाकणे, पदपथ अशा कामांसाठी नगरसेवक आग्रह धरत असल्याचे महापालिकेच्या अधिकाऱ्यांनी सांगितले.

निधीच्या पळवापळवीसाठी क्लुप्त्या सुरू

महापालिका निवडणुकीच्या वर्षांमुळे नगरसेवकांच्या हाती अंदाजपत्रकाच्या माध्यमातून हजार कोटी रुपयांचा निधी देण्यात आला होता. या निधीतून नगरसेवकांनी अनेक कामे प्रस्तावित केली आहेत. याताली काही कामांच्या प्रस्तावांना मंजुरी मिळाली असून काही कामे मंजुरीच्या प्रतिक्षेत आहेत. त्यातच अंदाजपत्रकातील निधी परत जावू नये, यासाठीही अनेक नगरसेवकांकडून कामे सुचविण्यात आली आहेत. तर प्रकल्पांसाठी राखीव असलेला निधी खर्ची पडणार नसल्याने हा निधी वर्ग करून त्यातूनही कामे सुचविण्याचे प्रकार येत्या काही दिवसांत होण्याची शक्यता आहे.