जुन्नर : जुन्नर तालुक्यातील उदापुर येथील उज्वला शिंदे व सोमतवाडी येथील उज्वला सावंत यांनी स्पर्धा परीक्षेत यश मिळविले आहे. शिंदे हिची नगर परिषदेत राज्यसेवा अंतर्गत लेखापरीक्षक व लेखासेवा यापदी निवड झाली आहे तर सावंत हिची नागपूर वनविभागात वनरक्षक पदी निवड झाली आहे.

दोघी सर्वसामान्य शेतकरी कुटुंबातील मुलींनी प्रतिकूल परिस्थितीवर मात करत मिळविलेल्या यशाबद्दल त्यांचे अभिनंदन होत आहे. दोघीही येथील श्री शिवछत्रपती महाविद्यालयाच्या विद्यार्थीनी आहेत.

स्पर्धा परीक्षेत कठोर परिश्रम व चिकाटीने मिळविलेल्या यशाबद्दल संस्थेचे अध्यक्ष ॲड संजय काळे यांनी त्यांचा सत्कार केला.यावेळी अध्यक्ष प्रतिनिधी प्रा.व्ही.बी. कुलकर्णी, प्राचार्य डॉ. एम. बी. वाघमारे,उपप्राचार्य,प्राध्यापक,प्रबंधक व विद्यार्थी उपस्थित होते.

उज्वला शिंदे ही सर्वसामान्य शेतकरी कुटुंबातील असून महाविद्यालयात पदवी पर्यंत शिक्षण पूर्ण केले आहे. आई व वडील नसताना आजी लक्ष्मीबाई यांनी आपल्या नातीचा कठिण परिस्थितीत उत्तम संस्कार देऊन सांभाळ केला व तिला चांगले एम.कॉम पर्यत शिक्षण दिले. गेल्यावर्षी आजी लक्ष्मीबाईचे निधन झाले तरी अशा परिस्थितीत न डगमगता उज्वला हिने स्पर्धा परिक्षेचा अभ्यास चालु ठेवला व यश संपादन केले.

उज्वला सावंत महाविद्यालयात राज्यशास्त्र विषयात पदव्युत्तर शिक्षण घेत आहे. अनेक अडचणींना सामोरे जात व प्रामाणिक पणे प्रयत्न करीत नागपूर वनविभागात वनरक्षक या पदावर तिची निवड झाली आहे.

दोन्ही उज्वलांच्या उज्वल यशामुळे ग्रामीण व आदिवासी भागातील असंख्य विद्यार्थ्यांच्या स्वप्नाला नक्कीच नवे बळ मिळेल असा विश्वास ॲड संजय काळे यांनी यावेळी बोलताना व्यक्त केला.

'माझी आर्थिक परिस्थिती लक्षात घेऊन संस्थेचे अध्यक्ष ॲड संजय काळे यांनी माझे महाविद्यालयाचे शुल्क सलग तीन वर्ष माफ केले. प्राचार्य प्राध्यापकांनी तसेच माझ्या आजीने मला उत्तम संस्कार देऊन घडविले. अनेक वेळा अपयश येवून ही मी प्रामाणिकपणे अभ्यास केला व यश मिळविले '

- उज्वला शिंदे,लेखापरीक्षक

'ग्रामीण व आदिवासी भागातील मुले कोणतीही पार्श्वभूमी नसताना स्वतःच्या कष्टाने विविध स्पर्धा परीक्षेत यश संपादन करतात. ही अभिमानाची बाब आहे.एनसीसी व एनएसएस मधून अनेक विद्यार्थ्यांच्या व्यक्तिमत्वाचा सर्वांगिण विकास घडत आहे. त्यामुळे ते विविध क्षेत्रात यशस्वी होतात.

- ॲड संजय काळे