पुणे : सीबीएससी, आयसीएसई बोर्डाच्या विद्यार्थ्यांना अकरावी प्रवेशावेळी 'अंतर्गत गुण' ग्राह्य धरू नये, अशी माहिती प्रसार माध्यमांतून आम्हाला समजली, असे अचानक निर्णय घेणे चुकीचे असून, यामुळे विद्यार्थ्यांचे नुकसान होणार आहे. विद्यार्थ्यांनी वर्षभर मेहनत करून मिळविलेले "अंतर्गत' गुण रद्द करू नयेत, अशी मागणी पालकांनी पत्रकार परिषदेत केली.

विद्यार्थ्यांचे अंतर्गत गुण रद्द करू नयेत, या मागणीसाठी सीबीएससी आणि आयसीएसईच्या विद्यार्थ्यांचे पालक मुख्यमंत्री देवेंद्र फडणवीस आणि शिक्षणमंत्री विनोद तावडे यांना भेटणार असल्याचे पालकांच्या संघटनेने या वेळी सांगितले. सीबीएससी, आयसीएसई बोर्डाच्या विद्यार्थ्यांचे अकरावी प्रवेशावेळी "अंतर्गत 20 गुण' ग्राह्य धरावेत; तसेच कुठल्याच बोर्डातील विद्यार्थ्यांवर अन्याय करू नये, अशी मागणी या पालकांनी केली.

त्याचबरोबर इंटर्नल गुण रद्द करण्याबाबत कोणताही निर्णय झाला नसून असा निर्णय घेऊ नये, यासाठी आमदार मेधा कुलकर्णी यांच्या माध्यमातून मुख्यमंत्री आणि शिक्षणमंत्र्यांची भेट घेणार असल्याचे पालकांनी सांगितले. अशाप्रकारचा निर्णय घेण्यासाठी सध्याची वेळ चुकीची असून ऐन प्रवेशावेळी असा निर्णय घेणे अयोग्य आहे.

या निर्णयामुळे विद्यार्थ्यांच्या मानसिकतेवर परिमाण होईल, याची शासनाने दखल घ्यावी. सध्या सीबीएससी, आयसीएसई बोर्डाची प्रवेशप्रक्रिया संपली असल्याने सरकारने अशा प्रकारचा निर्णय घेतला, तर हजारो विद्यार्थांचे मोठे नुकसान होईल, असे पालकांनी सांगितले.