पुणे : कलम 370 हटविल्यानंतर जम्मू-काश्मीरमध्ये गुंतवणूक करण्यास अनेक जण इच्छुक आहेत. त्यासाठी आवश्यक असणारी लँड बँक तयार करण्याचे काम सध्या सुरू आहे. गुंतवणूक करण्यास इच्छुक असणाऱ्यांना आवश्यक असणाऱ्या पायाभूत सुविधा सध्या जम्मू-काश्मीरमध्ये उभारण्यात येत असल्याची माहिती, काश्मीरमधील डोडा जिल्ह्याचे जिल्हाधिकारी डॉ. सागर डोईफोडे यांनी सोमवारी दिली.

पुणे श्रमिक पत्रकार संघाच्यावतीने डॉ. डोईफोडे यांच्याशी वार्तालाप आयोजित करण्यात आला होता. त्यावेळी ते बोलत होते. शिक्षण, सेवा आणि शेती या क्षेत्रांमध्ये गुंतवणूक करण्यास सर्वाधिक जण इच्छुक असल्याचे दिसते. याबाबत त्यांच्याकडून प्राथमिक चौकशी देखील करण्यात आली आहे. येत्या पाच ते सहा महिन्यांमध्ये प्रत्येक कामांना  सुरुवात होईल, असा विश्वास डॉ. डोईफोडे यांनी व्यक्त केला.

कायदा आणि सुव्यवस्था राखण्यासाठी येथे काही बंधने ठेवण्यात आली होती. मात्र सामान्यांचा अधिकारांवर गदा येणार नाही, याची काळजी देखील घेण्यात आली होती. सध्या येथे अत्यंत शांतता असून येथील तरुणांना रोजगार उपलब्ध होण्याच्या दृष्टीने प्रयत्न सुरू असल्याचे डॉ. डोईफोडे यांनी सांगितले.