जिजामाता पतसंस्थेच्या उपाध्यक्षाचा राजीनामा
मंगळवेढा : संस्थेच्या कामकाजात अनियमितता होत असल्याचा आरोप करत जिजामाता महिला पतसंस्थेच्या उपाध्यक्षा रंजना जगदाळे यांनी आपल्या पदाचा राजीनामा दिला आहे. संचालक मंडळाच्या बैठकीत योग्य माहिती दिली जात नसल्याने तसेच कर्जवाटप प्रक्रियेत नियमांचे पालन होत नसल्याचा आरोप त्यांनी राजीनामा पत्रात केला आहे. २७ फेब्रुवारी २०२६ नंतर झालेल्या कोणत्याही बैठकीत आपण सहभागी नसल्याचेही त्यांनी स्पष्ट केले. राजीनाम्याची प्रत संस्थेसह जिल्हा उपनिबंधक व सहाय्यक निबंधक सहकारी संस्था कार्यालयाकडे देण्यात आली आहे. दरम्यान, तालुक्यातील प्रमुख पतसंस्थेतील या घडामोडीमुळे सहकार क्षेत्रात खळबळ उडाली आहे.