जुन्नर : कुणबी दाखला काढण्यासाठी आवश्यक असणारी कागदपत्रे,वंशावळ आदी माहिती देण्यासाठी शुक्रवार ता.०२ रोजी जुन्नर तालुका पंचायत समिती सभागृहात सकाळी १० वाजता मार्गदर्शनपर शिबिराचे आयोजन करण्यात आले असल्याची माहिती तहसीलदार रवींद्र सबनीस यांनी दिली.

याबाबत सकल मराठा समाज शिवजन्मभूमी जुन्नरच्या वतीने मंगळवार ता.३० रोजी तहसीलदारांकडे निवेदनाद्वारे मागणी करण्यात आली होती. या शिबिरात मराठा समाजाच्या कुणबी नोंदी आढळलेल्या समाज बांधवांनी सहभागी होऊन कुणबी दाखले काढण्याची प्रक्रिया समजावून घ्यावी असे आवाहन करण्यात आले आहे.

तालुक्यातील प्रत्येक गावातील मराठा समन्वयकांनी,समाज प्रतिनिधी, युवकांनी तसेच ज्यांच्या कुणबी नोंदी मिळालेल्या समाज बांधवांनी उपस्थित राहण्याचे आवाहन सकल मराठा समाजाचे वतीने करण्यात आले आहे.