Sakal India Foundation , ओतूर - सकाळ माध्यम समूहातील सकाळ इंडिया फाउंडेशनच्या माध्यमातून व पुण्यातील डिजिटल हेल्थ केअर क्षेत्रातील अग्रगण्य असलेल्या रोश इन्फॉर्मेशन सोल्युशन इंडिया प्रा. लि. या कंपनीच्या सहकार्याने जुन्नर तालुक्यातील पाच गरजू शाळांना नऊ ई-लर्निंग संच अभ्यासक्रमासह ओतूर येथील श्री संत गाडगे महाराज शिक्षण संकुलात वाटप करण्यात आले.

यावेळी सूर्यदत्त ग्रुप्स ऑफ इन्स्टिट्यूटस् चे संस्थापक अध्यक्ष डॉ. संजय चोरडिया,व्हाईस प्रेसिडेंट स्नेहल चोरडिया,ओतूर पोलीस ठाण्याचे सहायक पोलीस निरीक्षक सचिन कांडगे, विस्तार अधिकारी मंगल डुंबरे,सुशीला डुंबरे,गाडगे महाराज शिक्षण संकुल ओतूरचे संचालक नितीन पाटील उपस्थित होते.

यावेळी सकाळ इंडिया फाउंडेशन तर्फे ओतूर येथील संत गाडगेमहाराज माध्यमिक विद्यालयाला तीन ई - लर्निंग संच, तसेच ओतूर येथीलच श्री गाडगे महाराज प्राथमिक आश्रमशाळेला दोन संच. तर पिंपळगाव जोगा येथील संत गाडगे महाराज विद्या निकेतन माध्यमिक शाळेला दोन संच आणि धावशी येथील जिल्हा परिषद प्राथमिक शाळेला व उदापूर येथील कुलवडेमळा येथील जिल्हा परिषद प्राथमिक शाळेला प्रत्येकी एक संच असे एकूण नऊ ई - लर्निंग संच अभ्यासक्रमासह वाटप करण्यात आले.

तसेच यावेळी संबधीत शाळेच्या शिक्षकांना ई -लर्निंग संचाचा वापरून मुलांना अभ्यासक्रमाचे अध्यापन करण्याबाबत प्रशिक्षणही देण्यात आले.

याप्रसंगी सचिन कांडगे यांनी सकाळ सोशल फाउंडेशन व सकाळ इंडिया फाउंडेशनच्या कार्याचे कौतुक करून, ग्रामीण आदिवासी भागातील विद्यार्थ्यांना डिजिटल अभ्यासक्रम उपलब्ध करून दिल्याने याचा फायदा विद्यार्थ्यांना होणार असून, याच विद्यार्थ्यांमधून पुढे उद्याचे मोठे अधिकारी, डॉक्टर, इंजिनिअर व सायंटिस्ट घडतील असा विश्वास व्यक्त केला.

तसेच यावेळी डॉ.संजय चोरडिया यांनी श्री संत गाडगे महाराज शिक्षण संकुलातील व आश्रम शाळेतील व्यवस्था पाहून येथील विद्यार्थ्यांना सकाळ सोशल फाउंडेशन च्या शिफारशीतून प्रथम येणार्‍या विद्यार्थांसाठी राकेश शर्मा व कल्पना चावला शिष्यवृत्ती अशा दोन प्रत्येकी ११ हजार रुपयांच्या शिष्यवृत्ती स्व:खर्चाने सुरू करत असल्याचे यावेळी जाहीर केले.

यावेळी आश्रमशाळेतील विद्यार्थी,संबधीत शाळांचे शिक्षक उपस्थित होते.या कार्यक्रमाचे सूत्रसंचालन रविंद्र अहिनवे यांनी केले तर आभार शोभा तांबे यांनी मानले.गाडगे बाबांच्या पसायदानने कार्यक्रमांची सांगता झाली.