पुणे : नातेवाईकांसमवेत पीएमपीएल प्रवास करणाऱ्या एका महिलेच्या पर्समधील एक लाख रुपये किंमतीचे सोन्या-चांदीचे दागिने चोरट्यांनी लंपास केले. हा प्रकार शुक्रवारी डांगे चौक ते बेलबाग चौकादरम्यानच्या प्रवासात घडला. 

याप्रकरणी दुंडप्पा चौगुले (वय 63, रा. डांगे चौक) यांनी विश्रामबाग पोलिस ठाण्यात फिर्याद दाखल केली. त्यावरुन अनोळखी व्यक्तींविरुद्ध गुन्हा दाखल करण्यात आला.
 

पोलिसांनी दिलेल्या माहितीनुसार, फिर्यादी व त्यांची मेव्हणी असे दोघेजण डांगे चौक ते बेलबाग चौकादरम्यान पीएमपी बसमधून प्रवास करत होते. फिर्यादी यांच्या मेव्हणीने त्यांचे दागिने त्यांच्याकडील पर्समध्ये ठेवले होते. प्रवास करत असतानाच त्यांच्या पर्समधील सोन्याचे मंगळसुत्र, बांगड्या असा एक लाख रुपयांचा ऐवज चोरट्यांनी चोरुन नेला. ते बसमधून उतरत असताना पर्समधील दागिने चोरीस गेल्याचे त्यांच्या लक्षात आले, त्यानुसार त्यांनी विश्रामबाग पोलिस ठाण्यात फिर्याद दाखल केली.