जेजुरी, ता. २३ : श्री क्षेत्र जेजुरी (ता. पुरंदर) येथील खंडोबाचे मूळ स्थान असलेल्या कडेपठार डोंगरात वन विभाग आणि लिंगदेवता कडेपठार ट्रस्टतर्फे एक हजार देशी वृक्षांची लागवड करण्यात आली. ‘हरित कडेपठार’ उपक्रमांतर्गत पुणे व जेजुरीतील १५ संस्थांनी यात सहभाग नोंदवला.
यावेळी हिवरे बाजारचे सरपंच पोपटराव पवार, वनपरिक्षेत्र अधिकारी सागर ढोले, नगरसेविका ऐश्वर्या पठारे, जिल्हा परिषद सदस्या रूपाली झेंडे, डॉ. राजेंद्र खेडेकर, रघुनाथ ढोले, म्हाळसाकांत जेजुरीकर आदी मान्यवर उपस्थित होते. कडेपठार परिसरातील वनराई वाढवण्यासाठी आणि वन्यजीवांच्या संरक्षणासाठी हा उपक्रम हाती घेण्यात आला आहे.
पोपटराव पवार यांनी प्रत्येक नागरिकाने किमान एक झाड लावून त्याचे संगोपन करण्याचे आवाहन केले. अभिनेते सयाजी शिंदे यांनी व्हिडिओ कॉलद्वारे संवाद साधत या उपक्रमाचे कौतुक केले. कडेपठार पायरी मार्गाच्या दुतर्फा ही लागवड करण्यात आल्याने भविष्यात भाविकांना सावलीचा लाभ मिळणार आहे. जिजामाता हायस्कूल व पुण्यश्लोक अहिल्यादेवी विद्यालयाच्या विद्यार्थ्यांनीही या मोहिमेत उत्साहाने सहभाग घेतला. ॲड. मंगेश जेजुरीकर यांनी कार्यक्रमाचे नियोजन केले.