पुणे : कसबा विधानसभा मतदारसंघाच्या पोटनिवडणुकीत आक्रमक प्रचार झालेला असताना मतदानाच्या दिवशीही वरिष्ठ नेत्यांचे या निवडणुकीकडे लक्ष होते. मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी थेट फोन करून कसब्यातील स्थिती काय आहे याची चौकशी केली. तर काँग्रेसच्या नेत्यांनीही दर तीन तासांनी आढावा घेतला.

आज मतदानाच्या दिवशीही माजी सभागृहनेते गणेश बीडकर आणि काँग्रेसच्या कार्यकर्त्यांमध्ये धक्काबुक्कीची घटना घडली. ही निवडणूक घासून होणार असल्याने हक्काचे मतदार बाहेर काढावेत यासाठी यंत्रणा लागलेली असताना त्यानुसार काम होत आहे की नाही यावर भाजप व शिवसेनेचे नेते लक्ष ठेवून होते. मुख्यमंत्री शिंदे यांनी धीरज घाटे यांना फोन करून प्रभागात काय स्थिती आहे, मतदान किती झाले आणखी किती अपेक्षीत आहे यासंदर्भात फोन केला. तर गणेश बीडकर यांनाही शिंदे व फडणवीस यांनी फोन केले.

त्याचप्रमाणे पालकमंत्री चंद्रकांत पाटील, क्रीडा मंत्री गिरीश महाजन, प्रदेशाध्यक्ष बावनकुळे यांच्यासह इतर नेत्यांनीही कसब्यातील स्थिती जाणून घेण्यासाठी फोन केले.

कसब्याची जागा आपण जिंकू शकतो असा विश्‍वास काँग्रेस नेत्यांना असल्याने त्यांनीही आजच्या स्थितीकडे लक्ष ठेवून होते. प्रदेशाध्यक्ष नाना पटोले, सुनील केदारी यांच्यासह अनेक नेत्यांनी शहराध्यक्ष अरविंद शिंदे, मोहन जोशी यांना व इतरांशी संपर्क साधला.