पुणे:भाजप नेते किरिट सोमय्या यांना धक्काबुक्की झाल्याचे प्रकरण चांगलेच तापलेले असताना आता पुणे महापालिकेच्या सुरक्षा विभागाचे उपायुक्त माधव जगताप यांना खुलासा करण्याचे आदेश अतिरिक्त आयुक्तांनी दिले आहेत.

किरिट सोमय्या हे शनिवारी (ता.५) महापालिका आयुक्तांना भेटण्यासाठी आले असता शिवसैनिकांनी सोमय्या यांच्या विरोधात आंदोलन केले. अचानक सुरू झालेल्या या गोंधळामध्ये सोमय्या यांना धक्काबुक्की झाली, त्यामुळे ते पायऱ्यांवरून खाली पडले, तसेच त्यांच्या गाडीवर जोरजोरात बुक्क्या मारल्याने सोमय्या यांना काढता पाय घ्यावा लागला. याप्रकरणाचे राजकीय पडसाद उमटले असून, केंद्र सरकारकडेही याची तक्रार केली आहे. तर महापौरांनी देखील आयुक्तांना या प्रकरणाचा लेखी खुलासा करण्याची सूचना केली आहे.

हा गोंधळ झाल्याने पुणे महापालिकेच्या सुरक्षा व्यवस्थेतील त्रुटी समोर आल्या आहेत. सुट्टीच्या दिवशी महापालिका बंद असताना एवढ्या मोठ्या प्रमाणात शिवसैनिक आतमध्ये घुसले कसे हा प्रश्‍न उपस्थित झाला आहे. त्यामुळे त्यामुळे अतिरिक्त आयुक्तांनी उपायुक्त माधव जगताप यांना खुलासा करण्याचे आदेश दिले आहेत. माधव जगताप यांच्याकडून खुलासा आल्यानंतर सुरक्षा विभागाच्या कर्मचाऱ्यांवर कारवाई केली जाण्याची शक्यता आहे, असे सूत्रांनी सांगितले.

पोलिसांसोबत बैठक

सोमय्या यांचे प्रकरण झाल्यानंतर पोलिस अधिकाऱ्यांची व महापालिकेतील अधिकाऱ्यांची बैठक झाली आहे. महापालिकेत पुढील काही दिवस बंदोबस्त ठेवला जाणार आहे. तसेच महापालिकेने सीसीटीव्हीचे फुटेज प्रमाणित करून पोलिसांना दिले आहे.