नारायणगाव - जुन्नर, आंबेगाव, खेड आणि शिरूर तालुक्यातील बिबट्यांची वाढती संख्या आणि हल्ले रोखण्यासाठी बिबट प्रजनन नियंत्रण करावे. तसेच या चारही तालुक्यात दिवसा थ्री फेज वीज पुरवठा करावा.

खासदार डॉ. अमोल कोल्हे यांनी केलेल्या या मागणीला प्रतिसाद देत या संदर्भात तातडीने बैठक बोलावण्याचे निर्देश केंद्रीय वने व पर्यावरणमंत्री भुपेंद्र यादव आणि वनविभागाचे महासंचालक चंद्र प्रकाश गोयल यांनी दिले आहेत. अशी माहिती खासदार डॉ.अमोल कोल्हे यांनी दिली.

शिरूर लोकसभा मतदारसंघातील जुन्नर, आंबेगाव, खेड आणि शिरूर तालुक्यात बिबट्यांच्या संख्येत मोठी वाढ झाली आहे. मानवी वस्त्यांत पाळीव जनावरे व शेतकऱ्यांवर बिबट्यांकडून होणारे हल्ले वाढले आहेत. या हल्ल्यात अनेक लहान मुलांसह शेतकऱ्यांचा मृत्यू झाला आहे. बिबट्या नियंत्रणासाठी ठोस उपाययोजना केल्या जात नाही.

बिबटे पकडण्यासाठी पिंजरे लावणे पुरेसे नाही. बिबट प्रजनन नियंत्रण करण्याची गरज आहे अशी भूमिका खासदार डॉ. कोल्हे यांनी सातत्याने उपस्थित केली आहे. या संदर्भात खासदार डॉ. कोल्हे यांनी आज केंद्रीय वने व पर्यावरणमंत्री भुपेंद्र यादव व वन विभागाचे महासंचालक गोयल यांची भेट घेतली.

या भेटीत खासदार डॉ. कोल्हे यांनी बिबट प्रजनन नियंत्रण करावे या मागणीबरोबरच बिबट प्रवण क्षेत्रात दिवसा थ्री फेज वीज पुरवठा करण्याची आणि बिबट-मानव संघर्षाबाबत अधिक प्रभावी उपाययोजना करण्याची विनंती केली. या विनंतीला सकारात्मक प्रतिसाद देत केंद्रीयमंत्री यादव आणि महासंचालक गोयल यांनी तातडीने बैठक बोलावण्याचे निर्देश अधिकाऱ्यांना दिले आहेत.

डॉ. अमोल कोल्हे, खासदार - शिरूर लोकसभा मतदारसंघ

बिबट्यांच्या हल्ल्याइतकाच घोणस व इतर विषारी सर्पदंशाचा विषयही गंभीर झाला असून बिबट्यांच्या हल्ल्याच्या निकषानुसार विषारी सर्प दंशाने मृत्यू झालेल्या अथवा कायमचे अपंगत्व आलेल्या व्यक्तीच्या कुटुंबियांना आर्थिक मदत देण्याची मागणी या वेळी करण्यात आली.या संदर्भात केंद्रीयमंत्री यादव व महासंचालक गोयल यांनी स्नेक बाईट सेंटर सुरू करता येईल का? किंवा घोणस सर्पदंशाचे प्रमाण कमी करता येईल का? याची चाचपणी करण्याचे निर्देशही दिले.