खडकी - ‘मातंग समाजाने शिक्षणावर भर दिला पाहिजे. त्यामुळे समाजातील मुलांच्या रोजगाराचा प्रश्न मिटेल. अण्णा भाऊ साठे योजनेंतर्गत मिळणाऱ्या निधीत वाढ केली जाईल,’’असे केंद्रीय सामाजिक न्याय राज्यमंत्री रामदास आठवले यांनी सांगितले. 

राज्य सरकारतर्फे ज्येष्ठ साहित्यिक उत्तम बंडू तुपे यांना मुळा रोड येथे घर बांधून दिले आहे. त्यांच्या हस्तांतरप्रसंगी रविवारी आठवले बोलत होते. तुपे यांच्या घराच्या दुरवस्थेवर ‘सकाळ’ने प्रकाशझोत टाकला होता. त्यानंतर त्याची दखल सरकारसह समाजातील विविध स्तरांतून घेण्यात आली.  

हस्तांतरप्रसंगी आमदार विजय काळे, उपमहापौर डॉ. सिद्धार्थ धेंडे, नगरसेविका सोनाली लांडगे, आदित्य माळवे, परशुराम वाडेकर आदी उपस्थित होते. 

दरम्यान, लोकशाहीर अण्णा भाऊ साठे यांच्या पुतळ्याचे व क्रांतिवीर लहुजी वस्ताद साळवे यांच्या शिल्पाचे अनावरण आठवले यांच्या हस्ते झाले. मातंग व बौद्ध समाजाने विकासासाठी एकत्र येण्याची गरज असून, वेगळ्या आरक्षणासाठी प्रयत्न केले जाणार असल्याचेही आठवले यांनी यावेळी सांगितले.