लोहगाव, ता. २६ : माहेरहून पैसे आणण्यासाठी शारीरिक आणि मानसिक छळ केल्याप्रकरणी पती, सासू, सासरा आणि नणंदेविरोधात लोहगाव पोलिस ठाण्यात गुन्हा दाखल केला आहे. याप्रकरणी न्यायालयाने पती आणि सासू-सासऱ्याच्या पोलिस कोठडीत सोमवारपर्यंत (ता. २) वाढ केली आहे.
न्यायालयाने अटकपूर्व जामीन फेटाळल्यानंतर २३ फेब्रुवारीला आरोपी स्वतःहून लोहगाव पोलिस ठाण्यात हजर झाले. याप्रकरणी पती आदित्य अनिल लोखंडे (वय २८), सासरे अनिल किसन लोखंडे (वय ५३), सासू सुवर्णा (वय ४८, सर्वजण, रा. मरकळ, ता. खेड) अशी अटकेत असलेल्या संशयितांची नावे आहेत.
याबाबत २६ वर्षीय विवाहितेने फिर्याद दिली आहे. त्यानुसार लग्नात दोन कोटी रुपये खर्च करण्यात आले. त्याशिवाय ५५ तोळे सोने, दोन किलो चांदी आणि आलिशान मोटार दिल्यानंतरही पतीचे दोन कोटी रुपयांचे कर्ज फेडण्यासाठी विवाहितेचा छळ करण्यात येत होता. सतत शिवीगाळ आणि मारहाण करून अत्याचार करण्यात येत असल्याचे फिर्यादीत नमूद केले आहे. साहाय्यक पोलिस निरीक्षक संतोष शिंदे करत तपास आहेत.