चाकण - ‘शिरूर लोकसभा मतदारसंघात या वेळी विजयाचा चौकार मारणार आहे. मतदारसंघात जनतेचा संपर्क मोठा असल्याने जनताच मला विजयी करणार आहे. राष्ट्रवादी काँग्रेसने त्यांच्या सत्तेच्या काळात काहीच केले नाही. त्यांच्या चुकांचे खापर माझ्यावर फोडून माझ्यावर टिका करणे योग्य नाही. जनता हे सर्व जाणते आहे,’’ अशी टीका खासदार शिवाजीराव आढळराव पाटील यांनी केली.

आढळराव पाटील यांच्या प्रचारासाठी महाळुंगे (ता. खेड) येथे महायुतीच्या वतीने जनसंपर्क दौऱ्याचे आयोजन करण्यात आले होते. या वेळी आमदार सुरेश गोरे, अशोक खांडेभराड, प्रकाश वाडेकर, शिवाजी वर्पे, किरण मांजरे, रामदास धनवटे, विनोद महाळुंगकर उपस्थित होते. 

आढळराव पाटील म्हणाले, ‘‘पुणे- नाशिक रेल्वेला केंद्रात भाजपचे सरकार असताना हिरवा कंदील मिळाला आहे. राष्ट्रवादी काँग्रेस, काँग्रेसचे सरकार असताना त्यांनी पुणे- नाशिक रेल्वेसाठी काहीच केले नाही. माझ्या पाठपुराव्यामुळे रेल्वेचे काम मार्गी लागत आहे. पुणे- नाशिक महामार्गाचे रुंदीकरणाचे कामही बहुतांश प्रमाणात झाले आहे. नाशिक फाटा ते राजगुरूनगर या रस्त्याचे कामही मार्गी लागणार आहे. यासाठी माझा सतत पाठपुरावा आहे. मुख्य शहरांची बाह्यवळणांची कामेही होणार आहे. पण, विरोधक टीका करताना वाहतूक कोंडीवर बोलतात. त्यांनी सत्तेत असताना काय केले? हा माझा सवाल आहे. चाकणला दोन बिनकामाचे पूल केले, हे त्यांचे पाप आहे. बैलगाडा शर्यती त्यांचे सरकार असताना बंद पडल्या, हेदेखील त्यांचे पाप आहे. त्याचे खापर खासदारांवर फोडणे चुकीचे आहे.’’ 
या वेळी आमदार सुरेश गोरे यांनी खेड तालुक्‍यातून खासदार आढळराव पाटील यांना मोठे मताधिक्‍क्‍य मिळणार आहे. खासदारांचा जनसंपर्क असल्याने जनता त्यांनाच निवडून देणार आहे.

आढळराव पाटील यांचा वाघजाईनगर, खराबवाडी, कान्हेवाडी, सांगुर्डी, येलवाडी, खालुंब्रे या गावांत प्रचार दौरा झाला.