विधानसभा 2019 : पुणे - ‘भाजप जमेल त्या मार्गाने परत सत्ता हस्तगत करण्यासाठी प्रयत्न करीत आहे. ज्या लोकांवर सतत भ्रष्टाचाराचे आरोप केले व ज्यांच्या विरोधात गेल्या निवडणुकीत लढले, त्यानांच आमिषे दाखवून पक्षामध्ये जाहीर प्रवेश  देण्यात आले. सत्तेसाठी भाजपला कशाचेही वावडे नाही,’’ अशी टीका अखिल भारतीय काँग्रेस कमिटीचे  महासचिव मधुसूदन मिस्त्री यांनी केली. 

काँग्रेसच्या वतीने मिस्त्री यांच्या अध्यक्षतेखाली एका बैठकीचे आयोजन करण्यात आले होते, या वेळी ते बोलत होते. आमदार डॉ. सुधीर तांबे, उल्हास पवार, मोहन जोशी, अंकुश काकडे, ॲड. वर्षा देशपांडे, अन्वर राजन, ॲड. असीम सरोदे, श्‍यामसुंदर सोन्नर, डॉ. विवेक कोरडे, हिरालाल पगडाल, श्रीकांत लक्ष्मी शंकर, ॲड. प्रभा सोनटक्के, अलीभाई शेख, ॲड. एम. एस. शिंदे, हृषीकेश पाटील, दिपेंती चिकणे, संतोष देशपांडे, ॲड. वनराज पवार, शाहीर कैलास जाधव, ॲड. शैलजा जाधव उपस्थित होते. 

मिस्त्री म्हणाले, ‘‘देशासमोरील संकटांना व विविध प्रश्नांना तोंड देण्यासाठी सर्वांनी एकत्र येणे गरजेचे आहे. देशाचे ऐक्‍य व अखंडत्व हे धोक्‍यात आले आहे. आज झुंडशाही, संविधानिक मूल्यांना दिली जाणारी तिलांजली, संस्थांच्या स्वायत्ततेला निर्माण झालेला धोका इत्यादीमुळे देशात यादवी निर्माण होईल इतकी गंभीर परिस्थिती आहे. यामुळे देशहितासाठी महाआघाडीच्या उमेदवारांना मतदान करावे.’