विधानसभा 2019 : पुणे - विधानसभा निवडणुकीसाठी २१ ऑक्‍टोबर रोजी मतदान होणार आहे. जिल्ह्यातील विधानसभा मतदारसंघातील मतदारांना मतदानाचा हक्क बजावता यावा, यासाठी विविध खासगी आस्थापनांमध्ये काम करणाऱ्या अधिकारी, कर्मचाऱ्यांना मतदानाच्या दिवशी पगारी सुटी देण्यात यावी, असा आदेश निवडणूक आयोगाने दिला आहे, अशी माहिती कामगार उपायुक्त विकास पनवेलकर यांनी दिली.

जिल्हा क्षेत्रातील दुकाने, निवासी हॉटेल्स, खाद्यगृह, नाट्यगृह, व्यापार, औद्योगिक उपक्रम किंवा अन्य आस्थापना, माहिती तंत्रज्ञान कंपन्या, शॉपिंग सेंटर्स, मॉल्स, रिटेल्स आदी आस्थापनांवरील कामगार, कर्मचाऱ्यांचा यात समावेश आहे. निवडणूक क्षेत्राबाहेर कार्यरत कर्मचाऱ्यांनाही मतदानाचा हक्क बजावता यावा, यासाठी पगारी सुटी देण्यात यावी. अपवादात्मक परिस्थितीत पूर्ण दिवस सुटी देणे शक्‍य नसल्यास दोन ते तीन तासांची सुटी देता येईल.

त्यासाठी मालकांनी जिल्हा निवडणूक अधिकाऱ्यांची पूर्वपरवानगी घेणे आवश्‍यक आहे. यासंदर्भात काही तक्रार असल्यास संबंधित कामगारांनी संपर्क साधावा, असे आवाहन कामगार उपायुक्त यांनी केले आहे.