पुणे - डॉक्‍टरकडून ७५ लाखांची खंडणी उकळणाऱ्या मनोज तुकाराम अडसूळ ऊर्फ अत्रे यास अमलीपदार्थ व खंडणीविरोधी पथकाने अखेर मुंबईतील घाटकोपर येथून गुरुवारी सकाळी अटक केली. त्याच्याकडून पाच लाख रुपये जप्त केले आहेत. न्यायालयाने त्यास पाच मार्चपर्यंत पोलिस कोठडी सुनावली. 

ताज्या बातम्यांसाठी डाऊनलोड करा ई-सकाळचे ऍप

डॉ. दीपक प्रभाकर रासने (वय ६९, रा. पर्वती) यांनी फिर्याद याप्रकरणी दिली होती. त्यांच्या डॉक्‍टर मुलाविरुद्ध विनयभंग व ॲट्रॉसिटीचा गुन्हा दाखल करण्याची भीती दाखवून मनोज अडसूळने ७५ लाखांची खंडणी घेतली होती. गुन्हा दाखल झाल्यानंतर तो पळून गेला होता. त्याचा अटकपूर्व जामीन अर्ज न्यायालयाने फेटाळला. नंतर त्याच्या अटकेचे प्रयत्न सुरू झाले. दरम्यान, अडसूळ हा मुंबईतील घाटकोपर येथे मित्राच्या घरी असल्याची खबर पोलिस उपनिरीक्षक संजय गायकवाड यांना मिळाली. पथकाने बुधवारी मध्यरात्री साडेबारा वाजता त्याला अटक केली. त्यानंतर गुरुवारी सायंकाळी पाच वाजता न्यायालयात हजर केले. 

वाहनांच्या खरेदीला लागला ‘ब्रेक’

या वेळी सरकारी वकील विजयसिंह जाधव यांनी आरोपीने गंभीर गुन्हा केला आहे. त्याला कोणी मदत केली आहे का? आणखी कोणाकडून खंडणी घेतली आहे का ? खंडणीची रक्कम कोणा-कोणास दिली ? या गुन्ह्यातील दुसरा आरोपी जयेश कासट याच्यासोबत अडसूळचे काय संबंध आहेत, याचा सखोल तपास करण्यासाठी पोलिस कोठडीची मागणी केली. त्यानुसार, प्रथमवर्ग न्यायदंडाधिकारी पी. एस. जोंधळे यांनी त्याला पाच मार्चपर्यंत पोलिस कोठडीत ठेवण्याचा आदेश दिला. बचाव पक्षातर्फे ॲड. विजयसिंह ठोंबरे यांनी बाजू मांडली.