पुणे : ‘‘कोरोना काळात एनसीसीच्या प्रशिक्षणाशी निगडीत अनेक आव्हाने समोर होती. ‘रिपब्लिक डे कॅम्प’साठी (आरडीसी) राज्यातील विविध भागातून एनसीसी कॅडेट्स येणार होते. त्यांचे प्रशिक्षण व आरोग्याची जबाबदारी सांभाळताना अनेक अडचणी येत होत्या. परंतु त्यावर मार्ग काढत सर्व कर्मचाऱ्यांनी या कठीण काळात विशेष योगदान दिले. एनसीसी बटालीयन प्रमुख म्हणून जबाबदारी पार पाडताना आव्हानांबरोबर अनेक चांगले अनुभव ही मिळाले.’’ अशी भावना कर्नल विनायक चव्हाण यांनी व्यक्त केली .

एनसीसीच्या (पुणे) २ गर्ल्स बटालियनचे प्रमुख कर्नल चव्हाण आणि कॅप्टन लक्ष्मण राजळे हे येत्या ३० ऑगस्टला सेवानिवृत्त होणार असून त्यानिमित्त शनिवारी सत्कार समारंभ योजित करण्यात आला होता. यावेळी ते बोलत होते. या प्रसंगी कर्नल अनिरुद्ध वाले, कॅप्टन लक्ष्मण राजळे, कॅप्टन काशिफा इनामदार, गर्ल्स कॅडेट इन्स्ट्रक्टर रिता खंडागळे व दिपाली दास, चीफ ऑफिसर आशा धेंडे आदी उपस्थित होते.  

कर्नल चव्हाण यांनी ऑगस्ट २०१९ मध्ये या बटालीयनच्या प्रमुखपदाचे पदभार स्विकारले होते. या दोन वर्षांच्या कालावधीत त्यांनी विविध मोहिमा आणि उपक्रम राबविले. यामध्ये एनसीसी मुख्यालयाच्या परिसरात हर्बल गार्डनपासून इतर सुविधा उभारणीसाठी काम केले. कॅडेट्सच्या घराघरामध्ये वृक्षारोपणाची अनोखी मोहिम, फिट इंडिया, डिजिटल फोरम सारख्या विविध मोहिमा राबवल्या. तसेच कोरोना काळात त्यांनी लसीकरण मोहिमेंतर्गत नोडल ऑफिसर म्हणून काम पाहिले.