शिर्सुफळ (पुणे) : बारामती तालुक्यातील मोजक्याच भागाचा विकास झाला आहे. मात्र आता भाजप सरकारच्या माध्यमातून सर्वच भागाच्या विकासासाठी अधिकाधिक विकास निधी आणण्यासाठी प्रयत्नशील राहु असे प्रतिपादन भारतीय जनता पक्षाचे तालुकाध्यक्ष व सावळचे सरपंच प्रविण आटोळे यांनी केले.

सावळ (ता.बारामती) येथे खासदार शरद पवार यांच्या खासदार निधीतून बांधण्यात येणाऱ्या सिमेंट बंधारा कामाच्या भूमिपूजन प्रसंगी आटोळे बोलत होते. यावेळी माजी सरपंच विठ्ठल आटोळे, दत्तात्रय विरकर, दत्तात्रय पवार, मारुती आटोळे, अनिल आवाळे, गंगाराम विरकर, युवराज आटोळे, दिपक आवाळे, जंम्बुकुमार धवडे, केशव साबळे, ग्रामसेवक रावबा गवंड, ठेकेदार दत्तात्रय वाबळे यांच्यासह ग्रामस्थ उपस्थित होते. 

यावेळी बोलताना आटोळे म्हणाले, सावळ येथील विकास कामांसाठी मागील सरकारच्या काळात दुजाभाव केला जात होता. मात्र आता भाजपा सरकारच्या माध्यमातून गावासह परिसरातील गावांच्या विकासासाठी अधिकाधिक निधी आणू अशी ग्वाही दिली. व विकासकामांमध्ये राजकारण न करता विकासासाठी नेहमीच पक्षीय जोडे बाजूला ठेऊन सर्वांनी एकत्र येण्याचे आवाहन केले. सर्व उपस्थितांचे आभार ग्रामसेवक रावबा गवंड यांनी मानले.