काळभैरव, बाल भैरवनाथांच्या
यात्रेस मसूरला आजपासून प्रारंभ

मसूर, ता. ३१ : येथील सद्‌गुरू रामदास स्वामी, छत्रपती शिवाजी महाराज, परमपूज्य गगनगिरी महाराज यांच्या पदस्पर्शाने पावन झालेल्या मसूरचे ग्रामदैवत श्री काळभैरव व बाल भैरवनाथांची यात्रा उद्या (रविवारी) व सोमवारी (ता. दोन) होणार आहे. यानिमित्त विविध धार्मिक व सांस्कृतिक कार्यक्रमांचे आयोजन करण्यात आले आहे.
उद्या (रविवारी) सायंकाळी सहा वाजता पारंपरिक वाद्यांच्या गजरात ‘श्रीं’चा छबिना निघणार आहे. मंदिरावर आकर्षक विद्युतरोषणाई करण्यात आली असून, संपूर्ण मंदिर परिसर फुलांनी सजवण्यात आला आहे. दर्शनासाठी येणाऱ्या भाविकांची गर्दी लक्षात घेता मंदिर व्यवस्थापकांकडून दर्शनबारीची चोख व्यवस्था करण्यात आली आहे. सोमवारी सकाळी अभिषेक व महापूजा होणार आहे.
यात्रेतील इतर कार्यक्रमांमध्ये जिल्हा परिषदेच्या निवडणूक आचारसंहितेमुळे बदल करण्यात आला आहे. बुधवारी (ता. ११) दुपारी तीन वाजता कुस्त्यांचे मैदान होणार आहे. या मैदानात दीड लाखापर्यंतच्या इनामी कुस्त्या होतील. रात्री नऊ वाजता लोकनाट्य तमाशाचा कार्यक्रम होणार आहे. या उत्सवाचा लाभ घ्यावा, असे आवाहन यात्रा कमिटीच्या वतीने करण्यात आले आहे.

----------------------------

02475
मसूर : येथील ग्रामदैवत श्री कालभैरव व बाल भैरवनाथांच्या मूर्ती.
-----------------------------