पुणे - पुणेकरांच्या सुरक्षिततेच्या ‘देवदूत’ योजनेतील गैरव्यवहार अंगलाट येत असतानाच महापालिकेच्या आपत्ती व्यवस्थापन विभागाचे प्रमुख गणेश सोनुने यांचा खुलासा खोटा असल्याचे बुधवारी (ता. १०) पुन्हा दिसून आले. ‘देवदूत’ची वाहने ज्या कंपनीची आहेत, त्या कंपनीच्या सर्वच वाहनांना निर्मितीपासूनच ‘मर्सिडिज बेंझ’चे इंजिन आहे. महापालिकेने जेव्हा सहा वाहने खरेदी केली तेव्हा या इंजिनासह एका वाहनाची किंमत केवळ ११ लाख ४७ रुपये इतकीच होती. त्यामुळे ‘मर्सिडिज बेंझ’ इंजिन असल्याने एका वाहनाला एक कोटी ८४ लाख रुपये मोजल्याचा सोनुने यांचा खुलासा फसवा आहे. 

या योजनेतील वाहन खरेदीसह तिच्या अंमलबजावणीत कोट्यवधी रुपयांचा गैरव्यवहार झाल्याचे ‘सकाळ’ने उघडकीस आणले आहे. एवढे पैसे देऊनही ठेकेदाराने नेमकी कोणती आणि काय कामे केली?  याची नोंद महापालिकेकडे नाही. तरीही गेल्या दीड वर्षात ठेकेदारासाठी २५ कोटी रुपये खर्च झाल्याचे प्रकरण उघड होताच, महापालिका आयुक्त सौरभ राव, सोनुने आणि आपत्ती व्यवस्थापन विभागाचे उपायुक्त सुनील गायकवाड यांनी खुलासे केले. त्यात, देवदूतच्या वाहनांची कार्यक्षमता वाढविण्यासाठी तिला ‘मर्सिडिज बेंझ’चे इंजिन असल्याचे सोनुने यांनी स्पष्ट केले. परंतु, तशी वस्तुस्थिती नसल्याचे प्रत्यक्ष पाहणीत आढळले. त्यामुळे या इंजिनासाठी म्हणून महापालिकेने कोणतीही अधिक किंमत वाहन कंपनीला मोजली नसल्याचे स्पष्ट झाले. 

दरम्यान, या योजनेसाठी जेव्हा वाहने खरेदी करायची होती, तेव्हा तीही ‘देवदूत’ची योजना राबविणाऱ्याच ठेकेदाराने पुरविली. त्यातही ठेकेदाराने त्याला वाटेल तेवढी रक्कम घेऊन महापालिकेला वाहने दिली. जी वाहने ठेकेदाराच्याच ताब्यात आहेत. त्यामुळे मूळ वाहन खरेदीतच तब्बल साडेदहा कोटींचा गैरव्यवहार असल्याचे आकड्यांवरून स्पष्ट झाले आहे. दरम्यान, रवींद्र धंगेकर आणि योगेश सासणे यांनी आंदोलन करीत या प्रकरणाच्या चौकशीची मागणी केली. 

चौकशी अहवाल तीन दिवसांत अपेक्षित
‘देवदूत’ योजनेच्या निविदा आणि अंमलबजावणीच्या चौकशीसाठी महापालिकेतील उपायुक्त राजेंद्र मुठे यांच्या अध्यक्षतेखाली समिती नेमण्यात आली आहे. तिचा अहवाल येत्या तीन दिवसांत येईल, असे महापालिका आयुक्त सौरभ राव यांनी सांगितले. राव यांच्या दाव्यानुसार मुठे समितीचा अहवाल गुरुवारी येणे अपेक्षित आहे. मात्र, या समितीची चौकशी नेमकी कोणत्या टप्प्यावर आहे, हे समितीतील अधिकाऱ्यांना सांगता आलेले नाही.