पुणे : महापालिका कोट्यवधींचा कर घेते. मात्र, पायाभूत सुविधाही पुरवत नाही. वाहतूक कोंडी आणि अतिक्रमणांनी डोके वर काढल्याने व्यवसायाला खीळ बसत आहे. त्यामुळे चार वर्षांत सुमारे ४० टक्के अर्थात दोन हजार लघुउद्योग येथून स्थलांतरित झाल्याची धक्कादायक माहिती नऱ्हे येथील उद्योजकांनी दिली. ही स्थिती अशीच राहिली तर आगामी काळात ही लघुउद्योगनगरी ओस पडेल, अशी भीती त्यांनी ‘सकाळ’कडे व्यक्त केली.

नऱ्हे, धायरी या दोन्ही गावांच्या वेशीवर ही उद्योगनगरी वसलेली आहे. मात्र, पाच वर्षांपासून समस्यांचा विळखा एवढा वाढला आहे की, येथे नवीन उद्योग येणे सोडाच, जुने उद्योजक येथून स्थलांतराच्या निर्णयावर आलेले दिसत आहेत. नऱ्हे आणि धायरी ही दोन्ही गावे महापालिकेत आल्याने या भागात शहरीकरण झपाट्याने वाढू लागले आहे.

ग्रामपंचायत बरी होती

सी टेक इंजिनिअर्स प्रायव्हेट लिमिटेडचे संचालक सतीश मुथा यांनी महापालिकेच्या कारभारावर नाराजी व्यक्त केली. ते म्हणाले, महापालिका नुसती करवसुली करत आहे. त्यांना आमच्या प्रश्नांचे काहीही पडलेले नाही. खरंतर आमचे लघुउद्योग आहेत. त्यामुळे त्यासाठी तशी करप्रणाली असायला हवी.

सरसकट व्यावसायिक कर लावण्याला काय अर्थ आहे. तसेच गावातील रस्त्यांची स्थिती महापालिकेला दिसत नाही का? आमच्या उद्योगांसमोर एवढी अतिक्रमणे झाली आहेत की, मालाची ने-आण करणे कठीण झाले आहे. ग्रामपंचायत असताना तरी पाणी, कचऱ्याचा प्रश्न उद्भवत नव्हता. आता मात्र कोट्यवधींचा कर भरूनही आम्हाला त्रास सहन करावा लागत असेल तर इथून स्थलांतरित होणेच चांगले.

१०० एकर उद्योगनगरीचे क्षेत्र

२५० कोटी रुपयेउद्योजकांकडून जाणारा कर

२ हजार चार वर्षांत उद्योगांचे स्थलांतर

७०० कोटी रुपये - वार्षिक उलाढाल

८० टक्के मिळकरकरात झालेली वाढ