मंचर (पुणे) : "शिरूर लोकसभा मतदार संघात मंगळवारी (ता. 28) पासून आभारदौरा सुरु आहे. या दौऱ्यात सत्कार समारंभ टाळून त्यावर होणारा खर्च बळीराजा व छावण्यासाठी द्यावा.'' असे आवाहन शिरूर लोकसभा मतदार संघाचे नवनिर्वाचित खासदार डॉ. अमोल कोल्हे यांनी केले आहे.  

ते म्हणाले, "अत्यंत प्रतिकूल परस्थितीत मी निवडणून आलो. त्यामुळे कार्यकर्त्यांचा उत्साह व जल्लोष मी समजू शकतो. पण राज्यात दुष्काळी परस्थिती असल्यामुळे बळीराजा आज मोठ्या अडचणीमध्ये आहे. पशुधन कसे जगवायचे हा प्रश्न पडलेला आहे. शिरूर लोकसभा मतदार संघात ज्येष्ठ नेते शरद पवार यांच्या सूचनेनुसार विधानसभेचे माजी अध्यक्ष दिलीप वळसे पाटील यांनी चारा छावण्या सुरु केल्या आहेत. शिरूर तालुक्यात दुष्काळाची तीव्रता अधिक आहे. बळीराजाला व छावण्याना मदत होण्यासाठी स्वागत व सत्काराचा खर्च टाळावा. फटाके, गुलाल-भांडार उधळून नये. डीजे वाजवू नये. शाल, बुके आणू नये. अशी माझी विनंती आहे.