पुणे : 'व्हाय आय किल्ड गांधी' (Why I Killed Gandhi) या चित्रपटात नथुराम गोडसेची (Nathuram Godse) भूमिका साकारल्यानं राष्ट्रवादीचे खासदार अमोल कोल्हे (Amol Kolhe) हे सध्या मोठ्या प्रमाणावर टीकेची धनी झाले आहेत. याप्रकरणावरुन काही दिवसांपूर्वी मोठा राजकीय गदारोळ माजला होता. याच पार्श्वभूमीवर कोल्हे यांनी आळंदी इथं आत्मक्लेश केला. (MP Amol Kolhe self tribulation in Alandi for playing role of Nathuram Godse)

कोल्हे म्हणाले, "सन २०१७ मध्ये मी 'व्हाय आय किल्ड गांधी' नावाचा सिनेमा केला होता. जो आता ओटीटी प्लॅटफॉर्मवर प्रदर्शित होणार आहे. या चित्रपटातील माझ्या भूमिकेबाबत अनेकांनी नाराजी व्यक्त केली होती. त्यापेक्षाही मला जास्त महत्वाचं हे वाटतं की अनेकांनी मला व्यक्तीशः ही गोष्ट सांगितली की, आम्ही तुम्हाला छत्रपती शिवाजी महाराजांच्या आणि छत्रपती संभाजी महाराजांच्याही रुपात स्विकारलं. पण आता तुम्हाला या भूमिकेत बघणं आम्हाला पसंत पडलेलं नाही. त्यांच्या विचारांना धक्का लागल्याची नाराजी अनेक युवा कार्यकर्त्यांनी माझ्याजवळ व्यक्त केली"

"२०१७ साली अजाणतेपणानं ही गोष्ट झाली. ज्यांच्या भावना दुखावल्या गेल्या आहेत त्यांच्याबद्दल मी नक्कीच दिलगीरी व्यक्त करतो. कारण जी भूमिका मी केली त्या विचारधारेचं समर्थन मी कधीही केलंल नाही आणि करणार नाही हे मी यापूर्वीच स्पष्ट केलेलं आहे. यानंतर नैतिकतेच्या दृष्टीकोनातून जी भूमिका मी भविष्यात घेईन ती आपल्यासमोर मी व्हिडिओच्या माध्यमातून लवकरच मांडणार आहे. कुठेही ज्या युवापिढीनं माझ्यावर हा विश्वास दाखवला त्यांच्या मनात देशाच्या इतिहासाविषयी, राष्ट्रपित्याविषयी एक संशयाचं वातावरण निर्माण होऊ नये असं मला वाटतं" असंही कोल्हे यावेळी म्हणाले.