पुण्यात गुन्हेगारीच्या (Pune Crime) घटनांमध्ये सातत्यानं वाढ होत आहे. त्यातच आता आणखी एक प्रकरण समोर आलंय. उधारीचे पैसे परत मागितल्याच्या रागातून एका तरुणाचा कुऱ्हाडीनं डोक्‍यावर वार करुन खून करण्यात आल्याची धक्कादायक घटना फुरसुंगी इथं घडलीय.

या प्रकरणी हडपसर पोलीस ठाण्यात (Hadapsar Police Station) खुनाचा गुन्हा दाखल करण्यात आला असून युवराज बाबुराव जाधव असं मृत तरुणाचं नाव आहे. तर, गणेश सुरेश खरात याला अटक करण्यात आलीय. गणेश हा सराईत गुन्हेगार असल्याचं कळतंय.

युवराजचे वडील बाबुराव जाधव यांची दुधाची डेअरी (Milk Dairy) आहे. त्यांचा मुलगा त्यांना व्यवसायात मदत करत होता. गणेशनं युवराजकडून 20 हजार रुपये हात उसणे घेतले होते. दरम्यान, युवराज हा गणेशकडं सातत्यानं दिलेलं पैसे मागत होता. रविवारी सायंकाळी साडेसातच्या सुमारास गणेश हा युवराजच्या घराबाहेर आला आणि युवराजनं पुन्हा एकदा गणेशकडं पैशासाठी तगादा लावला. याचा राग आल्यानं गणेशनं जवळील कुऱ्हाडीनं युवराजच्या डोक्‍यावर सपासप वार केले आणि त्याचा खून केलाय.