पुणे : देशाभरातील वैज्ञानिक प्रयोगशाळा अधिक लोकाभिमूख करण्यासाठी ‘एक आठवडा एक प्रयोगशाळा’ हा उपक्रम राबविण्यात येत आहे. त्याचाच एक भाग म्हणून राष्ट्रीय रासायनिक प्रयोगशाळेत (एनसीएल) २२ ते २७ मे दरम्यान सहा दिवसांचा कार्यक्रम आयोजित करण्यात येणार आहे.

याद्वारे आठवडाभर विविध विषयांवर चर्चा, परिसंवाद, स्टार्टअप एक्स्पो, कौशल्य विकास कार्यक्रम, ओपन डे आणि शालेय विद्यार्थ्यांसाठी विज्ञान प्रदर्शन आयोजित केले जाणार आहे. राष्ट्रीय स्तरावर ‘वन वीक वन लॅब’ नावाने परिचीत या उपक्रमाद्वारे प्रयोगशाळेती अत्याधुनिक संशोधनांचे प्रदर्शन करण्यात येत आहे.

एनसीएलच्या प्रदर्शन गॅलरीतून तंत्रज्ञान आणि त्याचे सामाजिक महत्व अधोरेखित करण्याचा हा प्रयत्न आहे. अभियानाचे उदघाटन प्राज इंडस्ट्रीजचे संस्थापक आणि अध्यक्ष डॉ. प्रमोद चौधरी यांच्या हस्ते होणार आहे. त्यानंतर पुढील सहा दिवस हायड्रोजनच्या उपयोजनात्मक अडचणी आणि त्यावर मात करण्याचे संभाव्य मार्ग, ऊर्जेचे संक्रमण आणि प्रवास, भारतीय शेतीसमोरील प्रमुख आव्हाने: वर्तमान आणि भविष्य, बायोमास व्हॅलॉरायझेशन, टाकाऊ पासून टिकाऊ इत्यादी सारख्या विषयांवर संबंधित क्षेत्रातील आघाडीच्या तज्ञांद्वारे सखोल चर्चा होणार आहेत.

नोंदणी आवश्यक

उपक्रमातील प्रत्येक सत्रासाठी जागा मर्यादित आहेत, त्यामुळे आपला प्रवेश ऑनलाईन नोंदणीद्वारे त्वरित निश्चित करा. अधिक माहिती आणि ऑनलाईन नोंदणीसाठी, https://owol.ncl.res.in या संकेतस्थळाला अवश्य भेट द्या.

समाजहितासाठी राष्ट्रीय रासायनिक प्रयोगशाळेने केलेले आजवरचे संशोधन आणि उत्कृष्ट उत्पादनांची नागरिकांना ओळख करून देण्याचा आमचा प्रयत्न हे. हा कार्यक्रम तरुण शास्त्रज्ञांना प्रेरणा देईल आणि आपल्या समाजात वैज्ञानिक दृष्टीकोन तसेच विज्ञान व तंत्रज्ञान आधारित संस्कृतीला चालना देईल.

- डॉ. आशिष लेले, संचालक, राष्ट्रीय रासायनिक प्रयोगशाळा