पुणे : राष्ट्रवादीचे नेते आणि माजी उपमुख्यमंत्री अजित पवार आजपासून दोन दिवस पुणे दौऱ्यावर होते. मात्र दुपारी दोन वाजता पत्रकारांशी संवाद साधल्यानंतर ते काही कामानिमीत्त कुठेतरी निघून गेले. त्यांच्या पुढील दौऱ्याबाबत कोणालाही माहिती नाहीये. त्यामुळे अजित पवार नेमकं कुठे गेले याबद्दल राजकीय वर्तुळात चर्चा रंगली आहे.

सुरक्षा यंत्रणा, स्वीय सहायकालाही माहिती नाही

विरोधी पक्षनेते आज (७ एप्रिल) सकाळी ते पुण्यात दाखल झाले. यानंतर त्यांनी बारामती होस्टेलवर सकाळपासून बैठका देखील घेतल्या तसेच दुपारी दोन वाजता पत्रकारांशी संवाद साधला. मात्र, त्यानंतर दौऱ्यातील कार्यक्रम सोडून ते अचानक काही कामानिमित्त बाहेर गेले. त्यांची सुरक्षा यंत्रणा तसेच स्वीय सहायक यांना देखील त्यांच्या पुढच्या दौऱ्याबाबत कल्पना नसल्याचे सांगण्यात येत आहे. सरकारनामाने याबद्दलचे वृत्त दिले आहे.

हेही वाचा - सामान्यांचा पैसा सुरक्षित ठेवण्यासाठीच Virtual Currency करकक्षेत

कार्यक्रमासाठी निघाले मात्र...

अजित पवार यांनी पत्रकारांशी संवाद साधल्यानंतर ते त्यांच्या कारने मुंढवा येथील कार्यक्रमासाठी निघाले मात्र कार्यक्रमस्थळापासून अगदी काही मिनीटांच्या अंतरावरून ते दुसरीकडे फिरले. त्यांनी सहकाऱ्यांना मुंढवा येथील कार्यक्रमाला उपस्थित राहण्यास सांगितले. पुणे शहर व परिसरात आज अजित पवार यांचे आठ कार्यक्रम होते. उद्या देखील त्यांचे शहरात काही कार्यक्रम आहेत त्यांना तरी अजित पवार उपस्थित राहाणार का याबद्दल प्रश्नचिन्ह आहे.

अजित पवार यापूर्व देखील असेच दौरा अर्धवट सोडून निघून गेल्याचे प्रकार घडले आहेत. मात्र प्रत्येक शुक्रवारी अजित पवार हे पुण्यात असतात. तसेच शनिवारी त्यांचा बारामती दौरा असतो.मात्र आजचा पुणे दौरा अर्धवट सोडला त्यावरुन राजकीय वर्तुळात विविध चर्चांना उधाण आले आहे.