बारामती शहर : ''बारामती लोकसभा मतदारसंघातील मतदारांनी माझ्यावर जो विश्वास् दाखविला, त्या विश्वासाबद्दल मी त्यांच्या समोर नतमस्तक आहे, आगामी पाच वर्षात देशात अव्वल लोकसभा मतदासंघ म्हणून बारामतीचा नावलौकीक अधिकाधिक वाढविण्याचा प्रयत्न मी करेन'', अशी प्रतिक्रिया बारामतीच्या नवनिर्वाचित खासदार सुप्रिया सुळे यांनी व्यक्त केली.
 
त्या म्हणाल्या, पक्ष संघटनेतील प्रत्येक कार्यकर्त्याने केलेले काम व मतदारांनी दाखविलेला विश्वास या मुळेच हे यश मी मिळवू शकले. विकासाबाबतीत जसा गेल्या पाच वर्षात बारामती मतदारसंघ अव्वल आहे. तसाच आगामी काळातही तो राहिल असा माझा प्रयत्न असेल. पाणी, रेल्वे मंत्रालयासह इतरही विषयात विविध कामे मार्गी लावण्यासह हा मतदारसंघ कुपोषणमुक्त व अँनिमियामुक्त करण्यास प्राधान्य असेल. शिक्षणाला प्राधान्य देत माझ्या मनात जी स्वप्ने आहेत ती पूर्ण करण्यासाठी मी निश्चित काम करेन.  गेल्या वेळेस माझे काम सर्वांनीच पाहिलेले आहे, यंदा लोकांनी विश्वास टाकल्याने माझ्यावरची जबाबदारी वाढलेली असून ही जबाबदारी योग्य रितीने पार पाडण्याचा माझा प्रयत्न असेल.
 
इतके मताधिक्य मिळेल असे वाटले होते का, असे विचारता मी मताधिक्याचा कधीच विचार केला नव्हता, माझा मतदारसंघ व माझा मतदार यांच्याशी माझे भावनिक नाते आहे, जेवढा वेळ मी माझ्या कुटुंबाला देते त्याहून अधिक वेळ मी माझ्या जीवनात माझ्या मतदारसंघात घालवते, त्या मुळे हे वेगळे भावनिक नाते आहे. बारामती मतदारसंघ हे माझे कुटुंब आहे, त्या मुळे या कुटुंबाकडे मताधिक्याच्या दृष्टीकोनातून मी कधीच पाहत नाही व पाहणारही नाही, असे सुळे म्हणाल्या. आज माझी जी ओळख आहे, ती माझ्या मतदारसंघामुळे आहे, मला आज जी विश्वासार्हता आहे ती बारामतीमुळे आहे याचा विसर मला कधीच पडणार नाही. 

पार्थच्या पराभवाबाबत आत्मचिंतन करणार
पार्थ पवार यांचा पराभव आम्ही मान्य केला आहे, या पराभवाचे आत्मचिंतन आम्ही केलच पाहिजे, कशामुळे नेमका पराभव झाला, या मागची कारणे काय आहेत, ते आम्ही तपासून पाहणार आहोत, माझे पार्थशी या बाबत बोलणे झाले असून या बाबत पुढील दिशा आम्ही ठरवू, असे सुप्रिया सुळे म्हणाल्या.