आंबेगाव : आंबेगावच्या दत्तनगर येथील असणारे टपाल कार्यालय कात्रज येथे स्थलांतरित झाले. स्थानिकांनी आंबेगाव बुद्रुक परिसरासाठी नवीन टपाल कार्यालय मिळावे यासाठी टपाल विभागाला अर्ज केले होते.

शिवाय आंबेगाव परिसरातील वाढते नागरीकरण या बाबींचा विचार करून, टपाल विभागाकडून मागणीला सक्रिय प्रतिसाद देत आंबेगाव खुर्द, शनिनगर चौक येथील लेकव्हिस्टा सोसायटीच्या परिसरात नवीन कार्यालय कार्यरत होणार असल्याची माहिती टपाल विभागाकडून देण्यात आली.

भारतीय टपाल खात्याने आंबेगावला ४११०७३ हा नवीन पिनकोड दिला आहे.तर येत्या दोन महिन्यांत आंबेगाव खुर्द येथे नवीन टपाल कार्यालय सुरू होणार असल्याची माहिती टपाल विभागाकडून देण्यात आली.

नव्याने पुणे महानगरपालिकेत समाविष्ट झालेला उपनगर परिसर झपाट्याने होतो आहे.त्यामुळे टपाल कार्यालयांची मागणी स्थानिकांकडून जोर धरत होती.ही मागणी लक्षात घेवून आणि नागरिकांना टपालाच्या सुविधा मिळण्यासाठी टपाल विभागाने नव्या उपनगरांत टपाल कार्यालयांचे जाळे विस्तारायला सुरुवात केली आहे.

आंबेगाव पाठोपाठ सहकारनगर आणि बावधन याठिकाणी टपाल कार्यालये सुरू करण्यात येणार आहेत.साधारण सहा महिन्याच्या कालावधीत ही तीनही कार्यालये कार्यरत होणार असल्याची माहिती टपाल सहायक अधीक्षक एस आर साबळे यांनी दिली.

आंबेगाव परिसरातील टपाल कार्यालयात केंद्राकडून मान्यता मिळाली आहे.शिवाय यासाठी लागणारी जागाही महापालिकेकडे उपलब्ध आहे. जागा मिळण्यासाठी आम्ही महापालिकेला पत्रव्यवहार केला आहे.येत्या दोन महिन्यात आंबेगाव येथील टपाल कार्यालय सुरू होईल.

- एस. आर. साबळे , सहायक अधीक्षक ,पुणे शहर पश्चिम विभाग.

'दत्तनगर येथील कार्यालयाचे स्थलांतर झाल्यानंतर आंबेगाव, जांभूळवाडी कोळेवाडी येथील जेष्ठ नागरिकांना छोट्या मोठ्या कारणासाठी कात्रजला जावे लागत होते.जाताना ज्येष्ठांना प्रवास करताना त्रासाला सामोरे कावे लागत होते.त्यामुळे आम्ही टपाल विभागाला आंबेगाव येथे नवीन कार्यालय सुरू करण्यासाठी पत्रव्यवहार करून मागणी केली होती.

- चंद्रकांत गुरव , अध्यक्ष जेष्ठ नागरिक संघ जांभूळवाडी रस्ता