Dam News : भोर तालुक्यातील नीरा-देवघर धरण १०० टक्के भरले असून धरणाच्या वीजनिर्मिती केंद्रातून ७५० क्यूसेक्सने पाण्याचा विसर्ग सुरु आहे. तालुक्यात समाधानकारक पाऊस झाल्यामुळे २ ऑगष्टला नीरा-देवघर धरणात ९० टक्के पाणीसाठा झाला होता.

त्यावेळी वीजनिर्मिती केंद्र सुरु करण्यात आले. वीजनिर्मिती केंद्रातून ७५० क्यूसेक्सने पाणी सोडल्याने दररोज ६ मेगाव्हॅट वीजनिर्मिती सुरु करण्यात आली. मात्र पाऊसाचे प्रमाण कमी झाल्यामुळे धरणाच्या पाणीपातळीत पुरेसी वाढ होत नव्हती.

त्यामुळे ८ ऑगष्टला वीजनिर्मिती केंद्रातून पाण्याचा विसर्ग ४०० क्यूसेक्सने कमी करून ३५० करण्यात आला. मागील दहा दिवसांमध्ये धरणातील पाण्याची पातळी वाढली आणि शनिवारी (ता.१९) रात्री धरण १०० टक्के भरून धरणात ११.९१ टीएमसी पाणीसाठा झाला.

शनिवारी रात्री बारा वाजता वीजनिर्मिती केंद्रातून पुन्हा ७५० क्यूसेक्सने पाण्याचा विसर्ग सुरु करण्यात आला. गेल्यावर्षी १३ ऑगष्टला नीरा-देवघर धरण शंभर टक्के भरले होते. नीरा-देवघर धरण क्षेत्रात पावसाचे प्रमाण वाढून धरणातील पाण्याच्या पातळीत वाढ झाल्यास धरणाच्या सांडव्याचे दरवाजे उघडण्यात येणार असल्याचे निरा पाटबंधारे विभागाचे श्रेणी १ चे सहाय्यक अभियंता योगेश भंडलकर यांनी सांगितले.

याशिवाय तालुक्यातील ब्रिटीशकालीन भाटघर धरणातही ८८.०६ टक्के पाणीसाठा झाला आहे. गेल्या वर्षी भाटघर धरण १२ ऑगष्टला भरून धरणाचे स्वयंचलित दरवाजे उघडले गेले होते.