डोर्लेवाडी - आजचा तरुण हा राष्ट्राचा कणा आहे. तरुणांनी व्यसनापासून दूर राहून निरोगी राहिले पाहिजे. व राष्ट्राचा कणा मजबूत ठेवला पाहिजे. मेखळी येथील योद्धा ग्रुपने कोरोना काळात केलेले कार्य प्रशंसनीय आहे.

प्रत्येक गावात एक योद्धा ग्रुप तयार झाला पाहिजे, व येणाऱ्या काळात आपला धर्म व गाय वाचवली पाहिजे. असे मत समाजप्रबोधन कीर्तनकार निवृत्ती महाराज देशमुख इंदुरीकर यांनी व्यक्त केले.

मेखळी (ता. बारामती) येथील कोविड काळात स्थापन झालेल्या योद्धा सोशल फाउंडेशन या सामाजिक संस्थेच्या वर्धापनदिनाच्या निमित्ताने आयोजित केलेल्या किर्तनाच्या कार्यक्रमात इंदुरीकर महाराज बोलत होते.

यावेळी टी डी एम या मराठी चित्रपटाचे निर्माते भाऊराव कराडे व चित्रपटाची संपूर्ण टीम, विरोधी पक्ष नेते अजित पवार यांचे OSD हनुमंत पाटील, अभिनेता पृथ्वीराज थोरात, कवी हनुमंत चांदगुडे, गायक किरण महाराज, सचिन देशमुख, ईश्वर माने, कपिल चव्हाण, वादक प्रवीण चव्हाण, गोरख कुंभार व वारकरी शिक्षण संस्थेचे सर्व विद्यार्थी, भजनी मंडळ, योद्धा ग्रुपचे सर्व सदस्य व ग्रामस्थ मोठ्या संख्येने उपस्थित होते.

इंदुरीकर महाराज म्हणाले, सध्या प्रत्येक जण सत्ता आणि पैसा यामागे धावत असून, त्यामुळे समाजभान विसरलेली तरुण पिढी तयार होत आहे. सध्या मोबाईलच्या अति वापरामुळे तरुण पिढी पाश्चात्य संस्कृतीचे अनुकरण जास्त करायला लागली आहेत. आपली मुले संस्कारक्षम असली पाहिजेत,त्यासाठी सर्वानी प्रयत्न करणे गरजेचे आहे.

कोरोनाच्या महाभयंकर काळात येथील योद्धा ग्रुपने रुग्णांना दवाखान्यात दाखल करण्यासाठी मदत करणे, ऑक्सिजन बेड उपलब्ध करणे, औषधोपचार मिळवून देणे, भोजनाची सोय करणे, कुटुंबियांना मानसिक आधार देणे, गावात औषध फवारणी करणे आदी प्रकार सेवा करून समाजात आदर्श निर्माण केला आहे. या समाजिक संस्थेचे कार्य अत्यंत उल्लेखनीय आहे. असे समाजसेवा करणारे योद्धा ग्रुप प्रत्येक गावात तयार झाला पाहिजेत. असे मत इंदुरीकर महाराजांनी व्यक्त केले.

टीडीएम चित्रपटाच्या टीमने यावेळी उपस्थितांशी संवाद साधला. ग्रामीण भागातील तरुणांना घेऊन त्यांचे प्रश्न मांडणारा हा सिनेमा करण्यात आला आहे. सर्वांनी चित्रपटगृहात जाऊन हा सिनेमा पहावा असे आवाहन चित्रपटाचे निर्माते भाऊराव कराडे यांनी यावेळी केले. योद्धा ग्रुपच्या सदस्यांनी कीर्तनकार निवृत्ती महाराज इंदुरीकर व टी डी एम चित्रपटाच्या टीमचा सत्कार केला.