दौंड, ता. २ : दौंड शहरात व्यसनमुक्त युवक संघाच्या वतीने नववर्षाच्या स्वागतासाठी ‘दारू नको, दूध प्या’ हा उपक्रम राबविण्यात आला होता. नागरिकांनी या उपक्रमाला चांगला प्रतिसाद दिला.
दौंड शहरातील छत्रपती शिवाजी महाराज चौकात बुधवारी (ता. ३१) रात्री नववर्षाच्या पार्श्वभूमीवर अष्टविनायक मार्गावर हा उपक्रम राबविण्यात आला. महाराष्ट्र व्यसनमुक्त युवक संघाचे संस्थापक तथा युवकमित्र बंडातात्या कराडकर महाराज यांच्या मार्गदर्शनाखाली पांडुरंग कदम, शहाजी काळे, ॠषिकेश ठोंबरे, सुनील कापसे आदींनी या उपक्रमासाठी पुढाकार घेतला. नागरिकांना विनामूल्य दूध वितरित करण्यात आले. नववर्षाचे स्वागत दारू पिऊन करण्यापेक्षा आरोग्यवर्धक दूध पिऊन करण्यासाठी यावेळी प्रबोधन करीत दूध वितरित करण्यात आले. शहरातील विविध पक्षांचे पदाधिकारी व व्यापारी यांनी या उपक्रमाचे कौतुक केले. स्वतः चे आणि कुटुंबाचे आरोग्य अबाधित ठेवण्यासाठी आणि सामाजिक स्वास्थ्य करिता व्यसनांपासून लांब राहण्याचे यावेळी व्यसनमुक्त युवक संघाच्या वतीने आवाहन करण्यात आले.