वाघोली -  कुटुंबीयांकडून मनाविरुद्ध लग्न ठरविल्याच्या कारणामुळे खासगी रुग्णालयामध्ये काम करणाऱ्या परिचारिकेने गळफास घेऊन  आत्महत्या केल्याची घटना उघडकीस आली. ही घटना येथील एका खासगी रुग्णालयात घडली.

प्रियंका कांबळे (वय २१, रा. नवले हॉस्पिटल, मूळ रा. उदगीर, लातूर) असे आत्महत्या केलेल्या परिचारिकेचे नाव आहे. प्रियंका ही वाघोलीतील नवले रुग्णालयातील एका खोलीमध्ये राहात होती. दरम्यान, कुटुंबीयांकडून मनाविरुद्ध लग्न ठरविले जात असल्याने ती गेल्या चार दिवसांपासून तणावाखाली होती. शुक्रवारी रात्री साडेनऊ वाजता ती खोलीमध्ये एकटीच होती. त्या वेळी तिने पंख्याला गळफास घेऊन आत्महत्या केली. तिच्या सहकारी जेवणासाठी तिच्या खोलीत पाणी आणण्यासाठी गेल्या, ही बाब त्यांच्या निदर्शनास आली. आत्महत्या करण्यापूर्वी तिने चिठ्ठी लिहून ठेवली होती. त्यामध्ये मनाविरुद्ध लग्न ठरविले जात असल्यामुळे आत्महत्या करीत असल्याचे नमूद केले आहे.