सकाळ न्यूज नेटवर्क
नवी दिल्ली, ता. २४ : लोकसभेचे अध्यक्ष ओम बिर्ला यांनी साठपेक्षा जास्त देशांसाठी स्थापन केलेल्या संसदीय मैत्री गटांमध्ये विरोधी पक्षांमधील काही नेत्यांचाही समावेश करण्यात आला आहे. सिंगापूरसोबत व्यापार करारावर चर्चा करणाऱ्या समूहात खासदार सुप्रिया सुळे यांचा समावेश करण्यात आला आहे, तर खा. अशोक चव्हाण यांच्याकडे अर्जेंटिना या देशांची जबाबदारी देण्यात आली आहे.
मित्र देशांसोबत भारताचे संबंध अधिक दृढ करण्याच्या उद्देशाने हे समूह काम करतील. सिंगापूरसाठी नेमण्यात आलेल्या समूहाचे नेतृत्व खा. सुळे यांच्याकडे देण्यात आले आहे. या समूहांच्या माध्यमातून भारत आणि संबंधित देशांतील लोकप्रतिनिधींमध्ये संवाद, विचारांची देवाणघेवाण आणि विविध क्षेत्रांतील सहकार्याला चालना दिली जाणार आहे. जगातील विविध देशांसाठी नेमण्यात आलेल्या संसदीय मैत्री समूहात ज्या खासदारांचा समावेश करण्यात आला आहे, त्यात रविशंकर प्रसाद, थंबीदुराई, पी. चिदंबरम, रामगोपाल यादव, टी. आर. बालू, काकोली घोष दस्तीदार, गौरव गोगोई, मनीष तिवारी, डेरेक ओ ब्रायन, अभिषेक बॅनर्जी, असदुद्दीन ओवेसी, अखिलेश यादव, के. सी. वेणूगोपाल, राजीव प्रताप रुडी, संजय सिंह, बैजयंत पांडा, शशी थरुर, निशिकांत दुबे, अनुराग ठाकूर, हेमामालिनी यांचा समावेश आहे.
इंडोनेशियाला जाणाऱ्या गटाचे नेतृत्व श्रीकांत शिंदे करतील, तर ब्राझीलला जाणाऱ्या शिष्टमंडळाचे प्रमुख म्हणून प्रफुल्ल पटेल हे काम पाहतील. अरविंद सावंत हे मोरोक्कोला जाणाऱ्या गटाचे नेतृत्व करणार आहेत. केनियाला जाणाऱ्या गटात नरेश म्हस्के आणि संजय राऊत यांचा, तर चिली देशात जाणाऱ्या गटात रवींद्र वायकर यांचा समावेश करण्यात आला आहे. वर्षा गायकवाड आणि श्रीरंग बारणे हे बाल्टिक देशांच्या दौऱ्यावर जाणार आहेत.