सिंहगड: पीएमपीएमएल बस व दुचाकीच्या समोरासमोर झालेल्या धडकेत दुचाकीस्वाराचा जागीच मृत्यू झाल्याची घटना सिंहगड रस्त्यावरील गोऱ्हे बुद्रुक येथे काल रात्री साडेआठ वाजण्याच्या सुमारास घडली आहे.

राजू तानाजी बोरगे (वय 38 सध्या रा. भैरवनाथ नगर किरकटवाडी, मूळ रा. शिरकोली ता. वेल्हे) असे मृत्यू झालेल्या व्यक्तीचे नाव असून याबाबत हवेली पोलीस ठाण्यात अकस्मात मृत्यूची नोंद करण्यात आली आहे.

खाजगी कंपनीत नोकरी करत असलेल्या राजू बोरगे यांची पत्नी पानशेत जवळील शिरकोली ( ता.वेल्हे) या गावची ग्रामपंचायत सदस्य असल्याने बोरगे यांचे सारखे गावी येणे-जाणे होते. काल रात्री साडेआठ वाजण्याच्या सुमारास गावाच्या दिशेने जात असताना डोणजे बाजूकडून भरधाव वेगाने येत असलेल्या पीएमपीएमएल बस व दुचाकीवर असलेल्या बोरगे यांची समोरासमोर धडक झाली.

डोक्याला गंभीर दुखापत झाल्याने अत्यवस्थ स्थितीत पडलेल्या बोरगे यांना गोऱ्हे बुद्रुक येथील ऑस्करवाडी मिसळच्या चालकांनी स्वतःच्या रिक्षाने उपचारांसाठी नेले परंतु उपचारापूर्वीच डॉक्टरांनी त्यांना मृत घोषित केले.

अपघाताची माहिती मिळताच हवेली पोलीस ठाण्याचे पोलिस हवालदार संतोष तोडकर, कॉन्स्टेबल मकसुद सय्यद हे तातडीने घटनास्थळी दाखल झाले होते. याबाबत हवेली पोलिस ठाण्यात अकस्मात मृत्यूची नोंद करण्यात आली असून पोलिस हवालदार विजय कांबळे अधिक तपास करत आहेत.