पुणे, - गोव्याहून पुण्याकडे येणाऱ्या स्पाइस जेटच्या विमानाला दोन तास विलंब झाल्यामुळे सुमारे १५० प्रवाशांची बुधवारी गैरसोय झाली. तसेच, पुणे- बंगळूर आणि बंगळूर- कोलकता मार्गावरील प्रवाशांनाही प्रत्येकी दोन तासांचा विलंब सहन करावा लागला. परिणामी, चारशेहून अधिक प्रवाशांची गैरसोय झाली. 

ताज्या बातम्यांसाठी डाऊनलोड करा ई-सकाळचे ऍप

स्पाइस जेटच्या (एसजी ५१७) विमानाचे गोव्यावरून दुपारी दोन वाजता उड्डाण होऊन ते दोन वाजून ५५ मिनिटांनी पोचणे अपेक्षित होते. परंतु, त्याचे उड्डाण सायंकाळी साडेचारच्या सुमारास झाले आणि ते पुण्याला सव्वापाच वाजता पोचले. याच विमानाचे पुण्यावरून बंगळूरकडे दुपारी साडेतीन वाजता उड्डाण अपेक्षित होते. परंतु, गोव्यावरून ते उशिराने आल्यामुळे बंगळूरकडे सायंकाळी पावणेसहाच्या सुमारास निघाले. परिणामी, बंगळूरकडे जाणाऱ्या प्रवाशांनाही पुणे विमानतळावर दोन तास ताटकळत थांबावे लागले.एक प्रवासी म्हणाला, ‘‘गोवा विमानतळावर स्पाइस जेटच्या कर्मचाऱ्यांनी विलंब का होत आहे, याबद्दल कोणतेही कारण दिले नव्हते. अखेर आम्ही आवाज चढविल्यावर तांत्रिक समस्या असल्याचे सांगण्यात आले.’’याबाबाबत स्पाइस जेटकडे विचारणा केली असता, ‘तांत्रिक कारणामुळे विमानाला उशीर झाला. प्रवाशांना झालेल्या त्रासाबद्दल आम्ही दिलगीर आहोत,’ असे सांगण्यात आले.