पुणे - पुणे जिल्हा मध्यवर्ती सहकारी बँकेच्या वतीने (पीडीसीसी) आगामी खरीप हंगामातील पिकांसाठी पीककर्ज वाटप करण्यास १ एप्रिलपासून सुरुवात करण्यात आली आहे. जिल्हा बॅँकेच्या वतीने जिल्ह्यातील सर्व पात्र शेतकऱ्यांना या कर्जाचा लाभ देण्यात येणार आहे.

जिल्हा बॅँकेने खरिपासाठी सुमारे २ हजार कोटींचे पीककर्ज वाटपाचे उद्दिष्ट ठेवले आहे. गतवर्षीच्या खरीप हंगामात हेच उद्दिष्ट एक हजार आठशे कोटी रुपयांचे ठेवण्यात आले होते. प्रत्यक्षात सुमारे एक हजार ९०० कोटी रुपयांचे कर्ज वाटप करण्यात आल्याचे जिल्हा बँकेतून सोमवारी (ता.१५) सांगण्यात आले.

जिल्ह्यातील शेतकऱ्यांना खरीप आणि रब्बी हंगामातील विविध पिकांसाठी पीककर्ज उपलब्ध करून देण्यात येते. यानुसार दरवर्षी १एप्रिल ते ३० सप्टेंबर या सहा महिन्यांच्या कालावधीत खरीप हंगामातील पिकांसाठी तर, १ आक्टोबर ते ३१ मार्च या सहा महिन्यांच्या कालावधीत रब्बी हंगामातील पिकांसाठी पीककर्ज वाटप करण्यात येते. खरीप पिकांसाठी वाटप केले जाणारे पीककर्ज हे अल्प मुदतीचे असते.

त्यामुळे दरवर्षी ३१ मार्चपर्यंत या कर्जाची परतफेड करणे बंधनकारक असते. या मुदतीत कर्जाची परतफेड करणाऱ्या शेतकऱ्यांना तीन लाखांपर्यंतच्या कर्जाला शून्य टक्के व्याजाचा लाभ मिळत असतो. शिवाय हेच शेतकरी पुढे नवीन वर्षातील खरीप हंगामातील पिकांसाठी कर्ज घेण्यास पात्र ठरत असतात, असेही यावेळी सांगण्यात आले.